برسلز: یورپین دارالحکومت برسلز میں قائم پاکستانی سفارتخانے نے یورپی رکن ممالک میں پاکستانی مشنز کیلئے تجارتی تعلقات کے نئے اور ابھرتے ہوئے انداز پر ایک آن لائن بریفنگ سیشن کا انعقاد کیا۔
اس بریفنگ کا مقصد GSP + اسکیم کے دائرہ کار کو بڑھانے اور یورپی پارلیمنٹ کے ذریعہ جی ایس پی قوانین کی توسیع سے متعلق میکانزم اور پیش رفت سے لے کر اہم تجارتی پہلوؤں پر ایک جامع آگاہی دینا تھا۔
اجلاس میں وزارت خارجہ، وزارت تجارت، ٹریڈ ڈویلپمنٹ اتھارٹی آف پاکستان (TDAP) اور یورپ میں مقیم تمام پاکستانی سفارتی مشنز کے نمائندوں نے شرکت کی۔
اس موقع پر یورپی یونین، بلجیم اور لکسمبرگ میں پاکستان کی سفیر آمنہ بلوچ نے بریفنگ کے شرکاء کو تجارتی اور ترقیاتی تعلقات کو بہتر طور پر سمجھنے کیلئے ایک اجمالی تصویر پیش کی۔ انہوں نے یورپی یونین میں پاکستان کے سفارتی مشنز کے درمیان تجارتی مسائل اور امکانات کو حل کرنے کیلئے ایک متفقہ نقطہ نظر کو یقینی بناتے ہوئے قریبی رابطہ کاری کی ضرورت پر بھی زور دیا۔
اس سیشن کے دوران پاکستان کی تجارت میں اضافے کیلئے قائم ادارے TDAP کو حکومت پاکستان کی جانب سے لاہور میں 18 سے 20 جنوری 2023 تک منعقد کیے جانے والے تیسرے انجینئرنگ اینڈ ہیلتھ کیئر شو کی تفصیلات بتانے کیلئے مدعو کیا گیا تھا تاکہ یورپ سے ممکنہ خریداروں اور سرمایہ کاروں کی زیادہ سے زیادہ شرکت کو یقینی بنایا جا سکے۔
یہ اقدام بلجیم میں پاکستانی سفارت خانے کے یورپی یونین میں پاکستان کے تجارتی اور اقتصادی مفادات کے تحفظ کیلئے پاکستانی سفارتی مشنز کے درمیان باہمی رابطے اور تعاون میں اضافے کے عزم کا اظہار ہے۔
