جہلم: رمضان المبارک رحمتوں، برکتوں اور مغفرت کے نزول کا مہینہ ہے، جو ہمیں صبر، تقویٰ، ایثار اور قربانی کا درس دیتا ہے۔
ان خیالات کا اظہار چیئرمین جہلم پریس کلب چوہدری عابد محمود نے جہلم پریس کلب کے صدر مہر محمد الیاس کی جانب سے دیے گئے افطار ڈنر سے خطاب کرتے ہوئے کیا۔
جہلم پریس کلب کے صدر مہر محمد الیاس کی جانب سے صحافی برادری کے اعزاز میں ایک پروقار افطار ڈنر کا اہتمام کیا گیا، جس میں پریس کلب کے عہدیداران و ممبران نے کثیر تعداد میں شرکت کی۔ اس موقع پر سابق صدر پریس کلب ملک وسیم اختر نے آنے والے مہمانوں کا استقبال کیا۔
افطار ڈنر میں شرکت کرنے والے نمایاں صحافیوں میں چوہدری ظفر نور، مرزا قدیر بیگ، شیخ ذوالفقار علی کاشف، سید مستفیض اقبال بخاری، عامر کیانی، راجہ جہانزیب خان، عبدالرحمن قادری، شہریار علی راجہ، چوہدری تصور حسین، مرزا راحیل بیگ، سید ناصر محمود، چوہدری مہربان حسین، غلام قادر مخلص، وسیم قریشی، فضل خان، انیس الرحمن بٹ، عبدالغفار، دانیال عابد سمیت دیگر شامل تھے۔
صدر جہلم پریس کلب مہر محمد الیاس نے اس موقع پر گفتگو کرتے ہوئے کہا کہ رمضان المبارک عبادت اور روحانی بلندی کا مہینہ ہے، جو صبر اور استقامت کا عملی درس دیتا ہے۔ انہوں نے مزید کہا کہ روزے کی حالت میں بھوک اور پیاس برداشت کرنا ہمیں صبر، شکر اور دوسروں کے احساس کی تربیت دیتا ہے۔
سابق صدر پریس کلب ملک وسیم اختر نے اظہار خیال کرتے ہوئے کہا کہ رمضان المبارک میں عبادت محض رسمی سرگرمی نہیں بلکہ یہ ایک ایسا عمل ہے جو انسان کے کردار میں مثبت تبدیلی کا پیش خیمہ ثابت ہو سکتا ہے۔ انہوں نے کہا کہ استقامت اور مستقل مزاجی سے عبادات پر عمل کرنا ہی حقیقی کامیابی ہے۔
افطار ڈنر میں شریک صحافیوں نے مہر محمد الیاس کی شاندار میزبانی اور بہترین انتظامات کو سراہا اور اس امید کا اظہار کیا کہ آئندہ بھی اس طرح کی تقریبات کا انعقاد جاری رہے گا تاکہ صحافی برادری کے درمیان اتحاد اور بھائی چارے کو مزید فروغ مل سکے۔
