پنڈ دادنخان: پنجاب پولیس کے شہید کانسٹیبل صفدر علی کی ستائیسویں برسی کے موقع پر ایک پُر وقار تقریب تھانہ پنڈ دادنخان کے نواحی علاقے دھریالہ جالپ میں ان کی مزار پر منعقد ہوئی۔
اس موقع پر پولیس افسران اور جوانوں نے شہید کی لحد پر حاضری دی، پھولوں کی چادریں چڑھائیں اور شہید کے درجات کی بلندی کے لیے دعائیں کیں۔
تقریب میں ڈی پی او جہلم طارق عزیز سندھو کی ہدایت پر ڈی ایس پی پنڈ دادنخان محمد اکرم، ایس ایچ اوز، پولیس جوانوں اور دیگر افسران نے شرکت کی۔ پولیس کے چاق و چوبند دستے نے شہید کی مزار پر سلامی پیش کی، جس سے فضا جذبہ حب الوطنی سے گونج اٹھی۔
شہید کانسٹیبل صفدر علی دورانِ ڈیوٹی چوہڑ چوک، ضلع راولپنڈی کے مقام پر پیٹرولنگ کے فرائض سرانجام دے رہے تھے کہ انہوں نے ایک مشکوک گاڑی کو روکنے کی کوشش کی، جس میں دہشتگرد سوار تھے۔ دہشتگردوں کی فائرنگ سے وہ شدید زخمی ہوئے اور زخموں کی تاب نہ لاتے ہوئے جام شہادت نوش کر گئے۔
ڈی پی او جہلم طارق عزیز سندھو نے اس موقع پر اپنے خصوصی پیغام میں کہا کہ "شہداء پولیس ہمارے ماتھے کا جھومر ہیں جن کی عظیم قربانیاں ناقابل فراموش ہیں۔ وہ بہادری اور شجاعت کی داستانیں رقم کرتے ہوئے ہمیشہ کے لیے امر ہوگئے۔ ان کی قربانیوں کا قرض ہم کبھی ادا نہیں کر سکتے۔”
انہوں نے مزید کہا کہ "شہداء کی فیملیز اور بچے مجھے اپنی فیملی اور بچوں کی طرح عزیز ہیں۔ ہم ان کے ساتھ کھڑے ہیں اور ہمیشہ رہیں گے۔”
شہید کانسٹیبل صفدر علی کی قربانی کو خراجِ عقیدت پیش کرتے ہوئے پولیس افسران اور جوانوں نے اس عزم کا اعادہ کیا کہ وہ ملک و قوم کی حفاظت کے لیے کسی قربانی سے دریغ نہیں کریں گے۔
