جہلم: سرکاری سکولوں کی نجکاری کے خلاف جہلم میں اساتذہ تنظیموں کا تعلیمی بائیکاٹ جاری، متعدد سرکاری سکولوں کے طلباء و طالبات کو چھٹی دے دی گئی۔
تفصیلات کے مطابق پنجاب بھر کی طرح ضلع جہلم میں بھی سرکاری سکولوں کی نجکاری کے خلاف اساتذہ تنظیموں کا احتجاج اور تعلیمی بائیکاٹ شروع ہو گیا ہے۔ ٹیچرز یونین کی جانب سے سکولوں کے باہر تعلیمی بائیکاٹ کے بینرز اور پوسٹر چسپاں کردیے گئے۔
جہلم میں متعدد گرلز اور بوائز سرکاری سکولوں کے طلباء و طالبات کو سکول پہنچنے کے بعد گھر واپس بھیج دیا گیا۔ طلباء و طالبات کو سکول لے کر آنے جانے والے گاڑیوں کے ڈرائیورز اور والدین پریشان ہیں۔
یاد رہےکہ دو روز قبل ٹیچرز یونین کی جانب سے تعلیمی بائیکاٹ کا اعلان کیا گیا تھا۔ گرینڈ ٹیچرز الائنس جہلم کا کہنا ہے کہ جب تک مطالبات پورے نہیں ہوتے تعلیمی بائیکاٹ جاری رہے گا۔
