جہلم: ڈپٹی کمشنر جہلم میر رضا اوزگن کی خصوصی ہدایت پر اسسٹنٹ کمشنر جہلم آفتاب اشرف نے محکمہ مال کے حوالے سے ایک اہم اجلاس میں شرکت کی۔
اجلاس کے دوران پنجاب اربن لینڈ سسٹم اینہانسمنٹ منصوبے کی کارکردگی کا تفصیلی جائزہ لیا گیا اور زمینوں کے ریکارڈ کی کمپیوٹرائزیشن کے عمل کو مزید تیز کرنے پر زور دیا گیا۔
اسسٹنٹ کمشنر جہلم آفتاب اشرف نے محکمہ مال کے افسران کو ہدایت جاری کیں کہ عدالتوں میں زیرِ التوا مقدمات کو ترجیحی بنیادوں پر نمٹایا جائے تاکہ سائلین کو فوری انصاف مل سکے۔
انہوں نے واضح کیا کہ مقدمات کے فیصلے میرٹ پر اور مقررہ وقت کے اندر ہونے چاہئیں تاکہ عوامی شکایات کا بروقت ازالہ ممکن ہو سکے۔
اجلاس کے دوران محصولات کے اہداف کے حصول پر بھی تفصیلی تبادلہ خیال کیا گیا۔ انہوں نے تمام فیلڈ عملے کو سختی سے ہدایت کی کہ سالانہ مالیاتی اہداف کے حصول کے لیے تمام ممکنہ اقدامات کیے جائیں۔
انہوں نے مزید کہا کہ سرکاری واجبات کی وصولی میں کسی قسم کی سستی برداشت نہیں کی جائے گی اور بہتر کارکردگی نہ دکھانے والے عملے کے خلاف سخت محکمانہ کارروائی عمل میں لائی جائے گی۔
