جہلم: انسپکٹر جنرل پنجاب پولیس کے دفتر کی جانب سے ایک اہم مراسلہ جاری کیا گیا ہے جس میں پنجاب بھر بشمول جہلم سے ایسے 222 انسپکٹرز کی تفصیلات طلب کی گئی ہیں، جنہیں ڈپٹی سپرنٹنڈنٹ آف پولیس (ڈی ایس پی) کے عہدے پر ترقی کے لیے زیر غور لایا جا رہا ہے۔
مراسلے کے مطابق ہر انسپکٹر کے لیے ریکمنڈیشن رول، دیانت داری رپورٹ، جنرل سروس ریکارڈ، کریمنل ریکارڈ (اگر کوئی ہو)، گزشتہ تین سالوں میں دی گئی سزاؤں کی وضاحت یا معافی اور متعلقہ افسران سے تصدیق شدہ فیصلوں کی نقول مہیا کرنا لازمی قرار دیا گیا ہے۔ تمام تفصیلات آئی جی آفس کو 5 اگست 2025 تک ارسال کرنا ہوں گی۔
ابتدائی فہرست میں جن افسران کے نام شامل کیے گئے ہیں، ان میں عامر مشتاق، عبدالطیف شاہد، خرم گل، سید علی جود، ابرار حسین، خالد محمود، رائے ناصر عباس، علی ندیم جعفری، اسد بخاری، بشارت علی، محمد نواز، جاوید ارشاد، محمد طارق، شاہد حسین، عرفان اسلم، بشیر احمد، محمد اکرم، محمد عباس، رضوان علی، محمد اسلم، ذیشان حیدر، زاہد حسین، صابر علی، محمد بلال، عبدالرحمان سمیت دیگر افسران شامل ہیں۔
مراسلے میں واضح کیا گیا ہے کہ ترقی کے فیصلے میرٹ، کارکردگی اور سروس ریکارڈ کی بنیاد پر کیے جائیں گے۔ کسی بھی افسر کے خلاف بدعنوانی، غیر تسلی بخش کردار یا سزا یافتہ ریکارڈ موجود ہونے کی صورت میں اس کا ترقی کے عمل میں شامل ہونا متاثر ہو سکتا ہے۔
ذرائع کے مطابق آئی جی آفس اس پورے عمل کو شفاف اور اصولی بنیادوں پر مکمل کرنا چاہتا ہے تاکہ محکمانہ ترقی کے نظام کو مزید موثر، منصفانہ اور میرٹ پر استوار کیا جا سکے۔
