پنڈدادنخان: محکمہ ہیلتھ اینڈ پاپولیشن پنجاب کی ہدایات پر صوبہ بھر کے مخصوص مراکز صحت میں منعقد کیے جانے والے 3 روزہ ہیلتھ اسکریننگ کیمپس کے سلسلے میں ڈسٹرکٹ ہیلتھ اتھارٹی جہلم کے زیر انتظام مریم نواز ہیلتھ کلینک کھیوڑہ میں بھی کیمپ کا باقاعدہ آغاز کر دیا گیا۔
کیمپ کا افتتاح سابق ایم پی اے مسلم لیگ (ن) حاجی ناصر للِہ، اسسٹنٹ کمشنر پنڈدادنخان عائشہ شفقت اور ڈپٹی ڈسٹرکٹ ہیلتھ آفیسر ڈاکٹر انجم قدیر نے کیا۔ اس موقع پر معززینِ علاقہ اور محکمہ صحت کے افسران بھی موجود تھے۔
ڈپٹی ڈسٹرکٹ ہیلتھ آفیسر ڈاکٹر انجم قدیر نے بتایا کہ تین روزہ اسکریننگ کیمپ کے دوران محکمہ صحت کا عملہ ہیپاٹائٹس بی اور سی، ایڈز، ملیریا، شوگر، ٹی بی اور خون کے مختلف ٹیسٹ کرے گا۔
انہوں نے بتایا کہ کیمپ میں ماں اور بچے کی صحت سے متعلق چیک اپ، کونسلنگ، ویکسینیشن اور غذائیت کی سہولیات بھی فراہم کی جا رہی ہیں، جبکہ فیملی پلاننگ اور جنرل طبی معائنے کے لیے ماہر ڈاکٹرز اور تربیت یافتہ عملہ بھی موجود ہوگا۔
سابق ایم پی اے حاجی ناصر للِہ نے حکومتی اقدام کو سراہتے ہوئے کہا کہ ایسے فلاحی طبی کیمپس عوام کو بہتر اور بروقت طبی سہولیات کی فراہمی میں اہم کردار ادا کرتے ہیں۔
انہوں نے ضلع جہلم میں صحت کی بہتر سہولیات فراہم کرنے پر ڈپٹی کمشنر جہلم، چیف ایگزیکٹو آفیسر ہیلتھ جہلم اور ڈی ڈی ایچ او پنڈدادنخان ڈاکٹر انجم قدیر کی کاوشوں کو خراجِ تحسین پیش کیا۔
