سوہاوہ: ڈومیلی کے نواحی علاقوں میں رابطہ سڑکوں کی خستہ حالی اور عدم تعمیر نے مقامی آبادی کو شدید مشکلات میں مبتلا کر رکھا ہے۔
کوہلیاں، غازیوٹ، سمبلی، علی پور، لَس فورپوٹھی سمیت مختلف دیہاتوں کی سڑکیں کھنڈرات میں تبدیل ہوچکی ہیں جبکہ چھپرمیرا اور دلوموڑہ کی لنک سڑکیں تاحال تعمیر ہی نہیں ہو سکیں۔
ان علاقوں کی سڑکیں گزشتہ بیس سال سے زائد عرصہ قبل تعمیر کی گئی تھیں جو پہلے ہی خستہ حالی کا شکار تھیں، تاہم حالیہ بارشوں کے باعث یہ مکمل طور پر ٹوٹ پھوٹ کا شکار ہو کر کھنڈرات میں تبدیل ہو گئی ہیں۔ جگہ جگہ گہرے گھڑے پڑنے سے حادثات پیش آنے لگے ہیں، گاڑیاں خراب ہو رہی ہیں اور عام عوام کو آمد و رفت میں شدید دشواری کا سامنا ہے۔
اہل علاقہ کا کہنا ہے کہ تھلہ چوہدریاں سے چھپرمیرا اور دلوموڑہ تک لنک روڈز آج تک تعمیر نہیں ہو سکیں۔ مختلف سیاسی جماعتوں کے نمائندے برسوں سے منتخب ہو کر آتے رہے مگر ان دیہات کی سڑکوں کی تعمیر کے لیے کوئی عملی قدم نہ اٹھایا گیا۔ بارش کے دنوں میں سڑکوں پر کیچڑ جمع ہونے سے دیہات کا شہر سے رابطہ کٹ جاتا ہے اور لوگ گھروں میں محصور ہو جاتے ہیں۔
مکینوں نے کہا کہ ہر لنک روڈ محض تین سے چار کلومیٹر کی ہے لیکن اس کے باوجود تعمیر نہ ہونا عوامی مسائل سے چشم پوشی ہے۔ عوامی و سماجی حلقوں نے ڈی سی جہلم میثم عباس اور ایم این اے چوہدری فرخ الطاف سے مطالبہ کیا ہے کہ فوری طور پر نوٹس لیا جائے، فنڈز منظور کیے جائیں اور ان لنک روڈز کی تعمیر جلد از جلد شروع کی جائے تاکہ عوام کو درپیش مسائل کا خاتمہ ممکن ہو سکے۔
