جہلم: اسسٹنٹ کمشنر جہلم عبداللہ غازی خان کی زیرِ صدارت شاندار چوک اور سول لائنز روڈ پر ٹریفک کے نظام کو مزید منظم اور رواں رکھنے کے حوالے سے اجلاس منعقد ہوا۔
اجلاس میں ڈی ایس پی ٹریفک، سیکرٹری آر ٹی اے، چیف آفیسر میونسپل کمیٹی اور رکشہ یونین کے دو نمائندہ وفود نے شرکت کی۔
اجلاس کے دوران شاندار چوک اور سول لائنز روڈ پر ٹریفک کی موجودہ صورتحال اور شہریوں کو درپیش مشکلات کا تفصیلی جائزہ لیا گیا۔ بالخصوص رکشوں کی آمدورفت، پارکنگ کے مسائل اور ٹریفک کے بہاؤ سے متعلق مختلف امور پر تفصیلی تبادلہ خیال کیا گیا۔
اس موقع پر رکشہ یونین کے نمائندگان سے بھی تجاویز حاصل کی گئیں اور ٹریفک کی روانی بہتر بنانے، غیر ضروری رش میں کمی لانے اور سڑکوں پر ٹریفک نظم و ضبط برقرار رکھنے کے لیے مختلف اقدامات پر غور کیا گیا۔
اسسٹنٹ کمشنر جہلم عبداللہ غازی خان نے متعلقہ محکموں کو ہدایت کی کہ شاندار چوک اور سول لائنز روڈ کے لیے جامع اور مؤثر ٹریفک پلان مرتب کیا جائے، جس میں شہریوں کی سہولت کے ساتھ ساتھ ٹریفک کی روانی اور رکشہ ڈرائیورز کو درپیش مسائل کو بھی مدنظر رکھا جائے۔
انہوں نے کہا کہ ٹریفک کے نظام میں بہتری کے لیے تمام متعلقہ ادارے باہمی رابطے اور مربوط حکمتِ عملی کے تحت مؤثر اقدامات یقینی بنائیں تاکہ شہریوں کو آمدورفت میں آسانی فراہم کی جا سکے اور اہم شاہراہوں پر ٹریفک کے دباؤ کو کم کیا جا سکے۔
