جہلم شہر سمیت مضافاتی علاقوں کی آبادی بڑھنے کے ساتھ ساتھ مسائل میں بھی غیر معمولی اضافہ ہونے لگا۔ شہری غیر ذمہ داری کا مظاہرہ کرتے ہوئے گھروں کا کوڑا کرکٹ قریبی خالی پلاٹوں ، نالوں میں پھینکنے لگے، شہری آبادیوں میں بیماریاں پھیلنے کا خطرہ ہے۔
تفصیلات کے مطابق جہلم شہر سمیت ملحقہ آبادیوں میں بڑھتی ہوئی آبادیوں کیوجہ سے مکین غیر ذمہ داری کا مظاہرہ کرتے ہوئے گھروں کی گندگی قریبی خالی پلاٹوں ، نالوں ، گلی محلوں یا سڑکوں کے کنارے پھینک دیتے ہیں جس کیوجہ سے آبادیوں میں گندگی ، کیڑے مکوڑے ، مچھراور بیماریاں پھیل رہی ہیں۔
گندگی سے اٹھنے والے تعفن سے ماحولیاتی آلودگی میں اضافہ ہو رہاہے ۔ شہریوں کو چاہیے کہ گھروں کی گندگی شہر میں جہاں فلتھ ڈپو یا ڈسٹ بن موجود ہیں وہاں پھینکیں تا کہ شہری آبادیاں گلی محلے گندگی سے پاک رہ سکیں۔
شہری تنظیموں کے عمائدین نے میونسپل کمیٹی کی انتظامیہ سے مطالبہ کیا ہے کہ شہر سمیت ملحقہ علاقوں کے گلی محلوں میں مزید ڈسٹ بن جبکہ ڈپٹی کمشنر مضافاتی علاقوں میں فلتھ ڈپو تعمیر کروائیں جہاں سے سینٹری ورکرز روزانہ کی بنیاد پر گندگی اٹھانے کے پابند ہوں۔
انہوں نے میونسپل کمیٹی کے ذمہ داران سے یہ بھی مطالبہ کیا ہے کہ شہر سمیت ملحقہ آبادیوں میں جو خالی پلاٹ موجود ہیں ان کے مالکان کو خالی پلاٹوں کے ادرگرد چاروں اطراف دیوار یںتعمیر کرنے کا پابند بنائیں تاکہ شہری علاقوں میں صفائی ستھرائی کے ساتھ ساتھ ماحولیاتی آلودگی کا خاتمہ ممکن ہو سکے۔
