لندن: سارہ شریف قتل کیس کی سماعت مکمل ہو گئی، اب جیوری اپنا فیصلہ دے گی۔
تفصیلات کے مطابق 10 سالہ سارہ شریف کے قتل کیس میں جہلم سے تعلق رکھنے والے والد، سوتیلی ماں اور چچا کے خلاف اولڈ بیلی کی عدالت میں چلنے والے مقدمے کی سماعت مکمل ہو گئی، جج نے جیوری کو اپنا فیصلہ دینے کے لیے کہہ دیا ہے۔
جیوری ممبران کیس پر غور کرنے کے بعد الگ الگ اپنا فیصلہ دیں گے، یہ جیوری 9 خواتین اور 3 مردوں پر مشتمل ہے، ہائیکورٹ کے جج نے جیوری ممبران کو ہدایت کی کہ اگر ہو سکے تو وہ ایک متفقہ فیصلے کے ساتھ واپس آئیں۔
جج نے جیوری سے یہ بھی کہا کہ وہ ہر ملزم کے خلاف قتل کے متبادل الزام کے طور پر غیر ارادی قتل کی فرد جرم پر بھی غور کر سکتے ہیں۔
سارہ شریف کی لاش گزشتہ سال ووکنگ، سرے میں اپنی رہائش گاہ سے ملی تھی، واقعے کے بعد سارہ کے والد، چچا اور سوتیلی والدہ پاکستان فرار ہو گئے تھے، سارہ کے جسم پر تشدد کے درجنوں نشانات پائے گئے تھے۔
پاکستان کے صوبہ پنجاب کے ضلع جہلم کے علاقہ کڑی جنجیل کے رہائشی 43 سالہ عرفان شریف، 30 سالہ بینش بتول اور 29 سالہ فیصل ملک پر قتل اور اقدام قتل کی فرد جرم عائد ہے، سارہ کے والد نے سماعت کے دوران جرم کے ارتکاب کا اعتراف کیا تھا تاہم سوتیلی والدہ اور چچا نے صحت جرم سے انکار کیا ہے۔
