جہلم پولیس کی اہم کارروائی، دریائے جہلم میں نہانے پر دفعہ 144 کی خلاف ورزی کرنے والے 4 افراد کو گرفتار کر لیا گیا۔
تفصیلات کے مطابق جہلم پولیس کی جانب سے شہریوں کی جان و مال کے تحفظ کو یقینی بنانے کے لیے موثر اقدامات جاری ہیں۔ دریائے جہلم اور ندی نالوں میں نہانے پر دفعہ 144 نافذ ہے تاکہ پانی میں ڈوبنے جیسے واقعات سے قیمتی انسانی جانوں کو بچایا جا سکے۔
اسی سلسلے میں تھانہ سٹی پولیس جہلم نے اہم کارروائی کرتے ہوئے دفعہ 144 کی خلاف ورزی پر چار ملزمان محمد عمران، محمد آصف، محمد ارشاد اور محمد عدنان کو دریائے جہلم میں نہاتے ہوئے گرفتار کر لیا۔
پولیس کے مطابق ان افراد نے قانون کی خلاف ورزی کرتے ہوئے دریا میں نہا کر اپنی جان کو خطرے میں ڈالا اور دفعہ 144 کی کھلی خلاف ورزی کی۔
ڈسٹرکٹ پولیس آفیسر جہلم طارق عزیز سندھو نے واقعے پر بات کرتے ہوئے کہا کہ شہریوں کی جان و مال کی حفاظت ہماری اولین ترجیح ہے۔ دریاؤں اور ندی نالوں میں نہانا جان لیوا ثابت ہو سکتا ہے، اسی لیے دفعہ 144 نافذ کی گئی ہے۔ عوام سے گزارش ہے کہ قانون کا احترام کریں اور اپنے بچوں کو ان خطرناک مقامات پر جانے سے روکیں۔
انہوں نے مزید کہا کہ پولیس قانون کی خلاف ورزی کرنے والوں کے خلاف کارروائی جاری رکھے گی تاکہ شہریوں کی قیمتی جانوں کا تحفظ یقینی بنایا جا سکے۔ جہلم پولیس عوامی آگاہی کے لیے بھی مہم جاری رکھے ہوئے ہے تاکہ ڈوبنے کے واقعات کی روک تھام ممکن ہو سکے۔
