جہلم کے علاقے چک مہمندہ میں معمولی تنازع پر دو گروپوں میں تصادم سے 12 افراد زخمی ہو گئے۔
تفصیلات کے مطابق منگل کے روز جہلم کے علاقے چک مہمندہ میں گزشتہ روز ہونے والی تلخ کلامی کے بعد دو گروپوں کے درمیان تصادم ہوگیا، جس کے نتیجے میں کلہاڑیوں اور ڈنڈوں کے وار سے دونوں فریقین کے 12 افراد زخمی ہوگئے۔
پولیس کے مطابق زخمیوں کو فوری طور پر ڈی ایچ کیو ہسپتال جہلم منتقل کیا گیا، جہاں انہیں طبی امداد فراہم کی جا رہی ہے۔
ذرائع کے مطابق تصادم ڈاکٹر قمر گروپ اور زیب علی گروپ کے درمیان ہوا۔ دونوں گروپوں کے درمیان گزشتہ روز معمولی تنازع پر تلخ کلامی ہوئی تھی، جو بعد ازاں جھگڑے کی صورت اختیار کر گئی۔
زیب علی گروپ کے زخمیوں میں زیب علی، طارق محمد، جہانگیر، منیر، رضوان، ثاقب علی اور محمد صغیر شامل ہیں، جبکہ ڈاکٹر قمر گروپ کے زخمیوں میں عبدالخالق، فہد علی، ڈاکٹر قمر، محمد زین اور خان سکندر شامل ہیں۔
پولیس کے مطابق دونوں گروپ آپس میں رشتہ دار ہیں اور واقعے کے حوالے سے دونوں فریقین کی جانب سے درخواستیں موصول ہو گئی ہیں۔ پولیس نے واقعے کی مزید تفتیش شروع کر دی ہے۔
