جہلم: ٹریفک پولیس کی ڈیل یا ڈھیل ، چنگ چی رکشہ ڈرائیوروں کی موجیں، لفٹررکشوں کو اٹھانے کی بجائے چھوٹی گاڑیاں اٹھانے میں مصروف، لفٹر عملے کا شہریوں سے بد تمیزی معمول بن گیا۔
تفصیلات کے مطابق جہلم شہر کی سڑکوں اور چوک چوراہوں میں کھڑے چنگ چی رکشوں اور چھوٹی گاڑیوں سے سڑکیں کھلوانے کے لئے ٹریفک پولیس نے لفٹر کا سہارا لے رکھا ہے ، اس طرح روزانہ کی بنیاد پر ٹریفک پولیس کا عملہ لفٹر کے ہمراہ ریلوے روڈ، تحصیل روڈ، اولڈ جی ٹی روڈ، سول لائن روڈ پر چھوٹی گاڑیاں اٹھاتے دکھائی دیتے ہیں جبکہ شاندار چوک کے چاروں اطراف کھڑے چنگ چی رکشوں نے رکشے کھڑے کرکے شہریوں کی آمدورفت میں مشکلات پیدا کررکھی ہیں۔
شہریوں کا اس حوالے سے کہنا ہے کہ ٹریفک پولیس کو چھوٹی گاڑیوں کے ساتھ ساتھ سڑکوں پر کھڑے رکشوں اور موٹر سائیکلوں کو بھی اٹھانا چاہیے تاکہ خریداری کے لئے آنے والے شہریوں کی مشکلات میں کمی واقع ہو سکے۔
شہریوں کا کہنا تھا کہ لفٹر عملہ شہریوں کے ساتھ توں تکرار کرنے کے ساتھ ساتھ بدتمیزی کرنے سے بھی گریز نہیں کرتاجو کہ انتہائی غیر اخلاقی حرکت ہے۔
شہریوں نے وزیراعلیٰ پنجاب، چیف سیکرٹری پنجاب ، آئی جی پنجاب ، ڈی آئی جی ٹریفک پولیس ، ڈی پی او جہلم ، ایڈوائزر صوبائی محتسب پنجاب جہلم سے مطالبہ کیاہے کہ اندرون شہر کی سڑکوں پر کھڑے رکشوں اور موٹر سائیکلوں کو اٹھانے کے احکامات جاری کئے جائیں تاکہ شہریوں کی مشکلات میں کمی واقع ہو سکے ۔
