جہلم پولیس نے تھانہ صدر جہلم کے مختلف مقدمات میں مطلوب دو اشتہاری ملزمان کو گرفتار کر لیا۔
ترجمان جہلم پولیس کے مطابق ایس ایچ او تھانہ صدر جہلم صداقت علی اور ان کی ٹیم نے کارروائی کرتے ہوئے اقدامِ قتل کے مقدمے میں مطلوب اشتہاری ملزم کو گرفتار کیا۔ پولیس نے ملزم کے قبضے سے واردات میں استعمال ہونے والا آلۂ ضرب، چھری بھی برآمد کر لی۔
پولیس حکام کے مطابق مذکورہ ملزم گرفتاری سے بچنے کے لیے روپوش ہو گیا تھا، تاہم پولیس ٹیم نے جدید سائنسی طریقۂ تفتیش کو بروئے کار لاتے ہوئے اس کا سراغ لگایا اور اسے گرفتار کر لیا۔
دوسری کارروائی میں تھانہ صدر جہلم پولیس نے قتل کے مقدمے میں سال 2023 سے مطلوب اشتہاری مجرم کو گرفتار کر لیا۔ پولیس کے مطابق یہ ملزم بھی گرفتاری سے بچنے کے لیے روپوش تھا، جسے جدید سائنسی طریقۂ تفتیش کی مدد سے ٹریس کرکے حراست میں لیا گیا۔
دونوں کارروائیوں کے حوالے سے ڈی پی او جہلم شفیق احمد چوہدری نے کہا کہ شہریوں کی جان و مال کا تحفظ پولیس کی اولین ترجیح ہے۔ جرائم پیشہ عناصر اور سنگین مقدمات میں مطلوب ملزمان کے خلاف بلاامتیاز کارروائیاں جاری رکھی جائیں گی۔
انہوں نے مزید کہا کہ جرائم کی روک تھام اور شہریوں کو محفوظ ماحول فراہم کرنے کے لیے جہلم پولیس تمام دستیاب وسائل بروئے کار لا رہی ہے۔
