پنجاب میں ٹریفک قوانین کی خلاف ورزی پر چالان کا جدید سسٹم متعارف کروا دیا گیا جس کے تحت اب چالان ثبوت کے ساتھ ملے گا۔
پنجاب سیف سٹی اتھارٹی کے اعلامیے میں کہا گیا ہے کہ ٹریفک قوانین کی خلاف ورزی پر بھاری جرمانہ ہوگا اور قوانین کی خلاف ورزی پر چالان ثبوت کے ساتھ ملے گا۔
اعلامیے کے مطابق پنجاب میں ترقی یافتہ ممالک کی طرح آرٹیفیشل انٹیلیجنس اور جدیدالیکٹرانک ٹریفک پولیسنگ سسٹم شروع کردیا گیا ہے، دھواں پھیلانے والی ہر گاڑی کی جدید کیمروں سے پڑتال کا آغاز بھی کردیا گیا ہے۔ ٹریفک چالان کا جدید سسٹم بھی شروع کر دیا گیا ہے۔
اعلامیے میں بتایا گیا ہے کہ وزیراعلی مریم نوازکے وژن کے مطابق سیف سٹی کیمروں کے ذریعے زیادہ دھواں دیتی گاڑیوں، ٹریفک اور ماحولیاتی قوانین کی خلاف ورزی پر الیکٹرانک چالان کا سلسلہ جاری ہے جب کہ جدید کیمروں سے گاڑیوں، موٹرسائیکلوں اورآٹورکشہ کے دھوئیں کی پڑتال کا عمل بھی جاری ہے۔
اعلامیے میں مزید بتایا گیا ہے کہ جدید دنیا کی طرح دھواں چھوڑتی گاڑی کی تصویر اور ویڈیوز بنانے کا سلسلہ جاری ہے، الیکٹرانک ٹکٹ میں دھواں پھیلانے والی گاڑی کی تصویر بھی لگا دی گئی ہے۔
اس حوالے سے سینئر وزیرپنجاب مریم اورنگزیب نے کہا کہ وزیراعلی پنجاب کی نگرانی میں ٹریفک پولیسنگ کا کلچر تبدیل ہورہا ہے، جدید ٹیکنالوجی سے ماحولیاتی تحفظ اور ٹریفک قوانین پرعمل درآمد یقینی بنایا جا رہا ہے۔
مریم اورنگزیب کا کہنا تھا کہ مرحلہ وار جدید الیکٹرانک ٹریفک پولیسنگ کا نظام پنجاب کے ہر شہر میں لاگو ہوگا، شہریوں کے تعاون سے پنجاب اسموگ فری اورجدید پولیسنگ والا مثالی صوبہ بنے گا۔
