جہلم: نیشنل کاؤنٹر ٹیررازم اتھارٹی (نیکٹا) اور حکومتِ پاکستان کی ہدایات پر ضلع جہلم کی حدود میں 89 کالعدم تنظیموں کے چندہ، زکوٰۃ، صدقات اور فطرانہ جمع کرنے پر مکمل پابندی عائد کر دی گئی ہے۔
ضلعی انتظامیہ اور قانون نافذ کرنے والے اداروں نے واضح کیا ہے کہ رمضان المبارک اور عیدالفطر کے دوران کسی بھی کالعدم تنظیم کو چندہ، زکوٰۃ، صدقات یا فطرانہ اکٹھا کرنے کی اجازت نہیں ہوگی، اور خلاف ورزی کی صورت میں سخت قانونی کارروائی عمل میں لائی جائے گی۔
حکام کے مطابق یہ تنظیمیں قومی سلامتی کے پیش نظر غیر قانونی قرار دی جا چکی ہیں، اور ان کی کسی بھی قسم کی فنڈ ریزنگ کو روکنے کے لیے سخت اقدامات کیے جا رہے ہیں۔
شہریوں سے بھی اپیل کی گئی ہے کہ وہ زکوٰۃ، فطرانہ اور دیگر عطیات صرف مستند اور رجسٹرڈ فلاحی اداروں کو دیں اور کسی مشکوک سرگرمی کی فوری اطلاع متعلقہ اداروں کو دیں تاکہ غیر قانونی سرگرمیوں کی روک تھام ممکن بنائی جا سکے۔
ضلعی انتظامیہ نے اس ضمن میں عوامی آگاہی مہم بھی شروع کرنے کا عندیہ دیا ہے تاکہ شہریوں کو کالعدم تنظیموں کے بارے میں مکمل معلومات فراہم کی جا سکیں اور کسی بھی غیر قانونی چندہ مہم کو جڑ سے ختم کیا جا سکے۔
