پنڈدادنخان: تحصیل ہیڈ کوارٹر ہسپتال پنڈدادنخان غریب عوام کے لیے وبال جان بن گیا،معدے میں تکلیف ہو یا کمر میں درد لیکن اس کو دل کی تکلیف ہے اسے فوراً راولپنڈی ہسپتال لے جائیں، ای سی جی مشینیں بھی ناکام، آٹومیٹک بلڈپریشر مشین بھی کبھی ڈاؤن اور کبھی بلڈ پریشر زیادتہ بتاتی ہے، غریب مریضوں کی دہائی۔
تفصیلات کے مطابق تحصیل ہیڈ کوارٹر ہسپتال پنڈدادنخان عرصہ دراز سے ڈاک خانہ کا کام سر انجام دینے میں پیش پیش ہے۔ مریض ایمرجنسی میں چیک کرانے آئے تو کہتے ہیں اس کو دل کی تکلیف ہے فوراً راولپنڈی لے جائیں۔ غریب آدمی جو پہلے ہی پریشان ہوتا ہے ڈاکٹر کی سن کر اس کی پریشانی میں مزید اضافہ ہو جاتا ہے اور وہ فوراً بیس سے پچیس ہزار روپے کی گاڑی کرا کر جب راولپنڈی پہنچتا ہے اور جب ہارٹ سپیشلسٹ کو چیک کرانے پر پتہ چلتا ہے کہ اس کو دل کا کوئی مسئلہ نہیں۔
آگے سے ڈاکٹر مریض کے لواحقین کو کہتا ہے کہ آپ کو کس بیوقوف نے کہا ہے کہ اس مریض کو دل کی تکلیف ہے۔ اس طرح غریب آدمی ایک دن میں 25 ہزار روپے کا ٹیکہ لگوا کر گھر واپس پہنچ جاتا ہے، گزشتہ دنوں میں اس طرح کے متعدد واقعات رونما ہوچکے ہیں۔
عوامی وسماجی حلقوں نے ڈپٹی کمشنر جہلم سمیت اعلیٰ حکام سے مطالبہ کیا ہے کہ خدارا ان غریب عوام پر رحم کیا جائے اور تحصیل ہیڈکوارٹر ہسپتال پنڈدادنخان میں موجود ای سی جی مشینیں اور بلڈپریشر مشین کی مرمت کی جائے تاکہ یہ صحیح رزلٹ دے کر مریض کی بیماری کی صحیح معنوں میں تشخیص کی جاسکے اور غریب آدمی کے پیسے بچائیں جا سکیں۔
