جہلم: تھانہ سول لائنز کے علاقے سلطان پورہ سے دو روز قبل پراسرار طور پر لاپتہ ہونے والی نوجوان لڑکی کو پولیس نے سوہاوہ سے بحفاظت بازیاب کر لیا۔
تفصیلات کے مطابق جہلم کے علاقے سلطان پورہ سے دو روز قبل ایک نوجوان لڑکی پراسرار طور پر لاپتہ ہو گئی تھی۔ اہلخانہ کے مطابق لڑکی گھر سے نکلنے کے بعد واپس نہ پہنچی، جس پر اس کی گمشدگی کی اطلاع پولیس کو دی گئی۔
پولیس کے مطابق لڑکی کا ذہنی توازن درست نہیں تھا، جس کے باعث اس کی گمشدگی کے بعد اہلخانہ کو تشویش لاحق ہوئی۔ اطلاع ملتے ہی پولیس نے فوری طور پر کارروائی شروع کی اور لڑکی کی تلاش کے لیے مختلف ذرائع کو بروئے کار لایا۔
پولیس نے سیف سٹی کیمروں کی مدد سے لڑکی کی نقل و حرکت کا سراغ لگایا، جبکہ مختلف مقامات پر نصب سی سی ٹی وی کیمروں کی فوٹیجز بھی چیک کی گئیں۔ مسلسل تلاش اور تکنیکی ذرائع سے مدد لیتے ہوئے پولیس ٹیم نے بالآخر لڑکی کو سوہاوہ سے تلاش کرکے بحفاظت بازیاب کر لیا۔
لڑکی کی بحفاظت بازیابی ڈی ایس پی سٹی محمد اکرم، ایس ایچ او سول لائنز چوہدری عمران اور پولیس ٹیم کی مسلسل کاوشوں کے نتیجے میں ممکن ہوئی۔
پولیس نے ضروری قانونی کارروائی مکمل کرنے کے بعد نوجوان لڑکی کو بحفاظت اس کے ورثاء کے حوالے کر دیا۔ لڑکی کے بحفاظت گھر پہنچنے پر اہلخانہ نے اطمینان کا اظہار کرتے ہوئے پولیس کا شکریہ ادا کیا اور بروقت کارروائی کو سراہا۔
