سوہاوہ میں جی ٹی روڈ پر ٹرالر نے موٹرسائیکل سواروں کو کچل دیا، 2 افراد جاں بحق جبکہ ایک شخص شدید زخمی ہو گیا۔
تفصیلات کے مطابق جہلم تحصیل سوہاوہ میں جی ٹی روڈ پر القادر یونیورسٹی کے قریب تیز رفتار 10 ویلر ٹرالر اور موٹرسائیکل کے درمیان ہونے والے خوفناک ٹریفک حادثے کے نتیجے میں دو افراد موقع پر جاں بحق جبکہ ایک شخص شدید زخمی ہو گیا۔ حادثے کے بعد ٹرالر ڈرائیور موقع سے فرار ہو گیا، جبکہ پولیس نے ٹرالر کو اپنی تحویل میں لے کر قانونی کارروائی شروع کر دی ہے۔
ریسکیو 1122 کے مطابق حادثے کی اطلاع ملتے ہی ایمبولینس اور ریسکیو ٹیم فوری طور پر جائے وقوعہ پر پہنچی۔ ریسکیورز نے زخمی شخص کو ابتدائی طبی امداد فراہم کرنے کے بعد مزید علاج کے لیے تحصیل ہیڈکوارٹر (ٹی ایچ کیو) ہسپتال سوہاوہ منتقل کر دیا، جبکہ جاں بحق ہونے والے دونوں افراد کی میتیں ضروری قانونی کارروائی کے بعد اسی ہسپتال منتقل کی گئیں۔
ریسکیو حکام کے مطابق جاں بحق ہونے والوں کی شناخت 21 سالہ انیب منور ولد منور حسین اور 44 سالہ طاہر انور ولد انور خان ساکنائے راولاکوٹ کے ناموں سے ہوئی ہے۔
حادثے میں زخمی ہونے والے شخص کی شناخت 31 سالہ محمد فیصل ولد مہندی خان سکنہ ڈاک خانہ عباس پور ضلع پونچھ کے طور پر ہوئی، جسے طبی امداد کے بعد ہسپتال منتقل کر دیا گیا۔
پولیس کے مطابق حادثے کے بعد ٹرالر کا ڈرائیور موقع سے فرار ہونے میں کامیاب ہو گیا، تاہم گاڑی کو تحویل میں لے لیا گیا ہے۔ واقعے کا مقدمہ درج کر کے فرار ڈرائیور کی تلاش اور حادثے کی وجوہات سے متعلق مزید تفتیش جاری ہے۔
پولیس کا کہنا ہے کہ قانونی کارروائی مکمل ہونے کے بعد جاں بحق افراد کی میتیں ان کے ورثاء کے حوالے کر دی جائیں گی، جبکہ متعلقہ قوانین کے تحت ذمہ دار افراد کے خلاف کارروائی عمل میں لائی جائے گی۔
