جہلم شہر اور گردونواح میں غیر رجسٹرڈ اور بغیر نمبر پلیٹس چنگ چی رکشوں کی بھرمار نے ٹریفک نظام درہم برہم کر دیا۔
چنگ چی رکشہ ڈرائیورز ٹریفک قوانین کی کھلم کھلا خلاف ورزی کرتے ہوئے سڑکوں پر تیز رفتاری اور ریس لگانے کے باعث شہریوں کے لیے خطرہ بن چکے ہیں۔ آئے روز ہونے والے حادثات میں متعدد شہری زخمی ہو چکے ہیں جبکہ حادثے کے بعد بیشتر ڈرائیورز رکشے سمیت موقع سے فرار ہو جاتے ہیں۔
شہریوں کا کہنا ہے کہ بغیر نمبر پلیٹس رکشوں کی وجہ سے نہ صرف قیمتی جانوں کو خطرات لاحق ہیں بلکہ پولیس کے لیے بھی ان ڈرائیورز کا سراغ لگانا انتہائی مشکل ہو جاتا ہے۔ عوامی حلقوں نے تشویش کا اظہار کرتے ہوئے کہا ہے کہ غیر رجسٹرڈ رکشے قومی خزانے کو بھی لاکھوں روپے کا نقصان پہنچا رہے ہیں، کیونکہ ان کی رجسٹریشن اور ٹوکن فیس ادا نہیں کی جاتی۔
شہریوں کے مطابق بڑی تعداد میں دیگر اضلاع سے تعلق رکھنے والے افراد ضلع جہلم میں رکشے چلا رہے ہیں، جن میں بعض جرائم پیشہ عناصر بھی شامل ہیں۔ یہ ڈرائیور نہ صرف ٹریفک قوانین کی خلاف ورزی کرتے ہیں بلکہ اکثر عوام سے بدتمیزی بھی کرتے پائے جاتے ہیں۔ تیز رفتاری اور لاپرواہی کے باعث قیمتی جانیں اور املاک خطرے میں ہیں۔
شہریوں نے اعلیٰ حکام سے مطالبہ کیا ہے کہ جہلم سمیت ضلع بھر میں بغیر نمبر پلیٹس اور غیر رجسٹرڈ چنگ چی رکشوں کے خلاف بھرپور کارروائی کی جائے۔ تمام رکشوں کی رجسٹریشن کو لازمی قرار دیا جائے اور ان پر نمبر پلیٹس آویزاں کروائی جائیں تاکہ قانون نافذ کرنے والے ادارے کسی بھی واقعے کی صورت میں بروقت کارروائی کر سکیں۔ اس کے ساتھ ساتھ دیگر اضلاع سے آنے والے رکشہ ڈرائیورز کی کڑی نگرانی کی جائے تاکہ سیکیورٹی خدشات بھی کم ہوں اور رجسٹریشن سے حکومتی ریونیو میں بھی اضافہ ممکن ہو سکے۔
