ملک بھر کی طرح ضلع جہلم میں جشن عید میلاد النبی ﷺ انتہائی عقیدت و احترام اور مذہبی جوش و جذبے کے ساتھ منایا گیا۔
عید میلاد النبی ﷺ کی مناسبت سے ضلع جہلم میں چراغاں اور عمارتوں کو برقی قمقموں سے سجا دیا گیا ہے جبکہ ہر سو درود و سلام و میلاد کی محافل کا انعقاد کیا گیا۔
جمعہ کو عید میلادالنبی ﷺ کے موقع پر جشن صبح بہاراں کا آغاز بارگاہ رسالت میں ہدیہ درود و سلام، اجتماعی دعاؤں سے ہوا۔ جشن ولادت مصطفی صبح بہاراں کی مناسبت سے محافل نعت، میلاد شریف، قصیدہ بردہ شریف، ختم درود پاک کی محافل منعقد کی گئیں۔
ولادت النبی ﷺ کے حوالے سے ضلع بھر میں جلوس و ریلیاں نکالی گئیں، جہلم کے کئی علاقوں سے چھوٹے بڑے جلوس نکالے جو مرکزی جلوس کا حصہ بنے۔
اس موقع پر مساجد، گھروں، گلیوں، شاہراہوں اور بازاروں کو برقی قمقموں سے سجایا گیا۔ رنگ برنگی روشنیوں سے سجی عمارتیں دلکش منظر پیش کرتی رہیں۔
ماہ ربیع الاول کی آمد کے ساتھ ہی ضلع جہلم کے مختلف علاقوں میں سرکای اور نجی عمارتوں، گلیوں، بازاروں، گھروں اور مساجد کو دلہن کی طرح سجا دیا گیا ہے۔ ربیع الاول کے آغاز سے ہی جہلم کے کئی علاقے برقی قمقموں سے جگمگا اٹھے۔
مختلف علاقوں کو نعلین مبارک اور سبز پرچموں سے سجایا گیا ہے۔ جشن ولادت رسولﷺ کی مناسبت سے شہر میں مختلف مقامات پر نیاز اور لنگر کا اہتمام کیا گیا ہے۔
پولیس کی جانب سے امن و امان کی صورت حال برقرار رکھنے کے لیے سکیورٹی کے سخت انتظامات کیے گئے تھے اور جلوس کی گزر گاہوں پر پولیس کے مستعد اہلکار تعینات رہے۔
