جہلم پولیس نے خود کو حساس ادارے کا افسر ظاہر کرنے والے مبینہ نوسرباز کے خلاف کارروائی کرتے ہوئے ملزم کو گرفتار کر لیا۔
ترجمان جہلم پولیس کے مطابق ایس ایچ او تھانہ سول لائنز اور ان کی ٹیم نے بروقت کارروائی کرتے ہوئے حساس ادارے کا جعلی ملازم بننے والے ملزم کو حراست میں لے لیا جبکہ اس کے خلاف مقدمہ درج کرکے مزید تفتیش شروع کر دی گئی ہے۔
پولیس ترجمان کے مطابق ملزم خود کو حساس ادارے کا ملازم ظاہر کر رہا تھا۔ پولیس نے کارروائی کرتے ہوئے ملزم کو گرفتار کیا اور اس کے خلاف قانونی کارروائی کا آغاز کر دیا ہے۔ واقعے کے دیگر پہلوؤں اور ملزم کے مبینہ طریقۂ واردات کے حوالے سے مزید تفتیش جاری ہے۔
ڈی پی او جہلم شفیق احمد چوہدری نے کہا کہ قانون کی خلاف ورزی کرنے والے عناصر کے خلاف بلاامتیاز کارروائیاں جاری ہیں۔ جعلی شناخت ظاہر کرکے شہریوں کو دھوکہ دینے اور سرکاری اداروں کا نام استعمال کرنے والوں کے ساتھ سختی سے نمٹا جائے گا۔
انہوں نے واضح کیا کہ شہریوں کو دھوکہ دہی سے محفوظ رکھنے اور قانون کی عملداری یقینی بنانے کے لیے پولیس اپنی کارروائیاں جاری رکھے گی۔
