جہلم: ضلع جہلم میں مرمت کے نام پر ہونے والی طویل اور غیر اعلانیہ بجلی بندش نے شہریوں کی مشکلات میں اضافہ کر دیا ہے۔ شدید گرمی اور حبس کے موسم میں دن اور رات کے مختلف اوقات میں کئی کئی گھنٹے بجلی کی عدم فراہمی کے باعث گھریلو زندگی، کاروباری سرگرمیاں اور تعلیمی معمولات بری طرح متاثر ہو رہے ہیں۔
متعدد صارفین نے شکایت کی ہے کہ بجلی کی بار بار بندش سے نہ صرف دکانوں اور کاروباری مراکز کو نقصان پہنچ رہا ہے بلکہ طلبہ و طالبات کی تعلیم، گھریلو امور اور خصوصاً بیمار، بزرگ اور بچوں کو بھی شدید مشکلات کا سامنا کرنا پڑ رہا ہے۔
شہریوں کا کہنا ہے کہ بجلی کی بندش یا کسی فالٹ کی صورت میں جب وہ آئیسکو کے متعلقہ دفاتر سے فون پر رابطہ کرنے کی کوشش کرتے ہیں تو اکثر فون کالز موصول ہی نہیں کی جاتیں۔ ان کا دعویٰ ہے کہ اگر کسی موقع پر رابطہ ہو بھی جائے تو شکایات کو مطلوبہ سنجیدگی سے نہیں لیا جاتا اور کئی بار شکایت درج ہونے کے باوجود بروقت ازالہ نہیں کیا جاتا۔
شہریوں نے ایک اور اہم مسئلے کی نشاندہی کرتے ہوئے کہا کہ شہر اور گردونواح کی متعدد گلیوں اور محلوں میں بجلی کے ننگے اور لٹکتے ہوئے تار شہریوں کے لیے خطرہ بنے ہوئے ہیں۔ ان کے مطابق بارشوں کے موسم میں یہ صورتحال کسی بھی وقت حادثے کا سبب بن سکتی ہے، اس لیے ان تاروں کی فوری مرمت اور تبدیلی ناگزیر ہے۔
عوامی حلقوں نے آئیسکو حکام، ضلعی انتظامیہ اور متعلقہ اداروں سے مطالبہ کیا ہے کہ غیر اعلانیہ لوڈشیڈنگ کا نوٹس لیا جائے، بجلی کی فراہمی کو بلا تعطل یقینی بنایا جائے، شکایات کے ازالے کے نظام کو مؤثر بنایا جائے اور خطرناک بجلی کی تاروں کو فوری طور پر درست کر کے شہریوں کی جان و مال کے تحفظ کو یقینی بنایا جائے۔
