سوہاوہ: سید کاظم عباس نقوی نے کہا ہے کہ پولیو ایک مہلک مرض ہے اور پاکستان و افغانستان کے علاوہ دنیا بھر کے اکثر ممالک اس موذی وائرس سے پاک ہو چکے ہیں۔
یونین کونسل سوہاوہ کے انچارج سید کاظم عباس نقوی نے اپنے ایک بیان میں کہا کہ پولیو کے مکمل خاتمے کے لیے 3 فروری سے 7 فروری 2025 تک ملک بھر میں انسدادِ پولیو مہم کا آغاز کیا جا رہا ہے، جس کے تحت سوہاوہ میں بھی پولیو ٹیمیں گھر گھر جا کر پانچ سال سے کم عمر کے بچوں کو پولیو سے بچاؤ کے قطرے پلائیں گی۔
انہوں نے والدین سے اپیل کی کہ وہ پولیو ٹیموں کے ساتھ مکمل تعاون کریں اور اپنے بچوں کو یہ ویکسین ضرور پلائیں تاکہ انہیں معذوری سے محفوظ رکھا جا سکے۔ ان کا کہنا تھا کہ پولیو سے بچاؤ کے دو قطرے پلانا ہر شہری کی قومی ذمہ داری ہے، کیونکہ یہی واحد ذریعہ ہے جس کے ذریعے ہم اپنی آنے والی نسل کو اس موذی مرض سے محفوظ بنا سکتے ہیں۔
سید کاظم عباس نقوی نے مزید کہا کہ ہمیں اس قومی مہم میں بھرپور حصہ لینا ہوگا تاکہ کوئی بھی بچہ پولیو ویکسین سے محروم نہ رہے۔ ان کا عزم ہے کہ پاکستان کو پولیو سے مکمل نجات دلا کر ایک صحت مند مستقبل کی بنیاد رکھی جائے۔ انہوں نے عوام سے درخواست کی کہ وہ انسدادِ پولیو مہم میں بڑھ چڑھ کر حصہ لیں اور پولیو فری پاکستان کے خواب کو حقیقت بنانے میں اپنا کردار ادا کریں۔
