جہلم: آر پی او راولپنڈی بابر سرفراز الپا نے ڈی پی او جہلم طارق عزیز سندھو کے ہمراہ سیف سٹی جہلم کا دورہ کیا اور جدید سیکیورٹی انتظامات کا جائزہ لیا۔
انہوں نے سیف سٹی پراجیکٹ کی عمارت، کنٹرول روم اور دیگر سہولیات کا معائنہ کیا، جہاں مینجر سیف سٹی اتھارٹی جہلم محمد سما یوسف نے انہیں پراجیکٹ کی ورکنگ اور جدید ٹیکنالوجی سے آراستہ سسٹم کے حوالے سے تفصیلی بریفنگ دی۔
آر پی او راولپنڈی نے کہا کہ سیف سٹی کے قیام سے ضلع جہلم میں جرائم کی شرح میں نمایاں کمی آئے گی اور پولیس کی کارکردگی مزید بہتر ہوگی۔
انہوں نے مزید کہا کہ سیف سٹی کے کیمرے مکمل طور پر آپریشنل ہیں اور قانون شکن عناصر کی گرفتاری میں اہم کردار ادا کر رہے ہیں۔ حکومت پنجاب کے ویژن کے مطابق سیف سٹی پراجیکٹ کے ذریعے شہریوں کو جدید سہولیات اور محفوظ ماحول کی فراہمی یقینی بنائی جا رہی ہے۔
جہلم میں "سیف ٹریول کیش سکواڈ” کا آغاز
آر پی او راولپنڈی بابر سرفراز الپا نے ڈی پی او جہلم طارق عزیز سندھو کے ہمراہ "سیف ٹریول کیش سکواڈ” کا باضابطہ آغاز کر دیا۔ اس سکواڈ کا مقصد شہریوں کی بینک سے رقم نکلوانے کے بعد تحفظ کو یقینی بنانا ہے۔
ڈی پی او جہلم طارق عزیز سندھو نے بتایا کہ اگر کوئی شہری بینک سے 10 لاکھ روپے یا اس سے زائد رقم وصول کرتا ہے تو وہ اپنی حفاظت کے لیے 15 پر کال کرکے جہلم پولیس کی مدد لے سکتا ہے۔ پولیس شہریوں کی جان و مال کی حفاظت کے لیے ہمہ وقت مستعد ہے اور انہیں محفوظ ماحول فراہم کرنے کے لیے تمام تر وسائل بروئے کار لائے جا رہے ہیں۔
