جہلم: ڈپٹی کمشنر جہلم میر رضا اوزگن کی زیر صدارت ایک اہم جائزہ اجلاس منعقد ہوا، جس میں ضلع بھر میں جاری ترقیاتی اور عوامی فلاحی منصوبوں پر پیش رفت کا تفصیلی جائزہ لیا گیا۔
اجلاس میں بیوٹیفکیشن سکیموں، پلس پروگرام، کے پی آئیز، ای بز پروگرام، پرائس کنٹرول مجسٹریٹس کی کارکردگی، ستھرا پنجاب ایجنسی کے صفائی آپریشنز اور واسا جہلم کی جانب سے مین ہولز کورنگ سمیت مختلف اہم امور زیر غور آئے۔
اجلاس کے دوران متعلقہ محکموں کے افسران نے اپنے اپنے شعبوں میں جاری سرگرمیوں، حاصل شدہ اہداف، درپیش مسائل اور آئندہ کے لائحہ عمل پر تفصیلی بریفنگ دی۔ بیوٹیفکیشن سکیموں کی رفتار، معیار اور تکمیلی مراحل کا جائزہ لیتے ہوئے ڈپٹی کمشنر نے ہدایت کی کہ تمام منصوبوں کو مقررہ ٹائم لائن کے مطابق معیاری انداز میں مکمل کیا جائے تاکہ شہری جلد از جلد ان کے ثمرات سے مستفید ہو سکیں۔
ڈپٹی کمشنر میر رضا اوزگن نے پلس پروگرام، کے پی آئیز اور ای بز پروگرام پر عملدرآمد کو مزید مؤثر بنانے پر زور دیتے ہوئے متعلقہ افسران کو ہدایت کی کہ تمام اہداف بروقت مکمل کیے جائیں اور کارکردگی میں مزید بہتری لائی جائے۔
اجلاس میں پرائس کنٹرول مجسٹریٹس کی کارکردگی کا بھی جائزہ لیا گیا۔ ڈپٹی کمشنر نے ہدایت کی کہ مارکیٹوں کے باقاعدہ فیلڈ وزٹ کیے جائیں، سرکاری نرخ ناموں پر سختی سے عملدرآمد یقینی بنایا جائے اور گراں فروشی، ذخیرہ اندوزی اور ناجائز منافع خوری کے خلاف بلاامتیاز کارروائیاں مزید تیز کی جائیں تاکہ عوام کو حقیقی ریلیف فراہم کیا جا سکے۔
اس موقع پر ستھرا پنجاب ایجنسی جہلم کو صفائی آپریشن مزید مؤثر بنانے جبکہ واسا جہلم کو شہر بھر میں مین ہولز کورنگ کا عمل تیز کرنے کی ہدایات جاری کی گئیں تاکہ شہریوں کو بہتر بلدیاتی سہولیات میسر آ سکیں۔
ڈپٹی کمشنر میر رضا اوزگن نے کہا کہ تمام سرکاری محکمے عوامی ریلیف، بہتر سروس ڈیلیوری اور حکومتی منصوبوں کے بروقت اہداف کے حصول کے لیے ذمہ داری، شفافیت اور تیز رفتاری کے ساتھ اپنے فرائض انجام دیں تاکہ شہریوں کو زیادہ سے زیادہ سہولیات فراہم کی جا سکیں۔
