جہلم پولیس نے غیر قانونی طور پر مقیم افغان شہری کو پناہ فراہم کرنے والے ایک ملزم کو گرفتار کر کے اس کے خلاف مقدمہ درج کر لیا۔
ترجمان جہلم پولیس کے مطابق ڈسٹرکٹ پولیس آفیسر جہلم شفیق احمد چوہدری کی ہدایات پر ایس ایچ او تھانہ صدر اور ان کی ٹیم نے مؤثر کارروائی کرتے ہوئے غیر قانونی طور پر مقیم افغان شہری کو رہائش اور پناہ فراہم کرنے والے ملزم کو گرفتار کر لیا۔
پولیس کے مطابق ملزم کے خلاف تھانہ صدر میں متعلقہ قانونی دفعات کے تحت مقدمہ درج کر لیا گیا ہے جبکہ واقعے کے دیگر پہلوؤں کے حوالے سے مزید تفتیش اور قانونی کارروائی جاری ہے۔
پولیس حکام کا کہنا ہے کہ غیر قانونی طور پر مقیم غیر ملکی افراد اور ان کے سہولت کاروں کے خلاف قانون کے مطابق سخت کارروائیاں جاری رکھی جائیں گی اور کسی کو بھی قانون کی خلاف ورزی کی اجازت نہیں دی جائے گی۔
ڈسٹرکٹ پولیس آفیسر جہلم شفیق احمد چوہدری نے کہا کہ ضلع میں امن و امان کے قیام، شہریوں کے جان و مال کے تحفظ اور قانون کی عملداری کو ہر صورت یقینی بنایا جائے گا۔ انہوں نے واضح کیا کہ غیر قانونی سرگرمیوں میں ملوث عناصر اور ان کے سہولت کاروں کے خلاف بلاامتیاز قانونی کارروائیاں آئندہ بھی جاری رہیں گی۔
