دینہ کا رہائشی 36سالہ نوجوان کرنٹ لگنے سے جاں بحق ہو گیا، جاں بحق ہونے والا نوجوان اپنے ڈیرے پر پنکھا لگا رہا تھا کہ اچانک کرنٹ آنے سے گر گیا اتنے میں کرنٹ والا پنکھا بھی اوپر آ گرا ، نوجوان کی ہلاکت پر والدین غم سے نڈھال۔
تفصیلات کے مطابق جہلم کی تحصیل دینہ کے ڈومیلی محلہ کے رہائشی 36 سالہ نوجوان کرنٹ لگنے سے جاں بحق ہو گیا۔ جاں بحق ہونے والا نوجوان عفان احمد الطاف، مدینہ ٹینٹ سروس کے مالک کا صاحبزادہ تھا۔
عفان احمد الطاف اپنے قائداعظم ٹاؤن میں واقع ڈیرے پر اکیلا موجود تھا اور سٹینڈ والا پنکھا لگا رہا تھا کہ اچانک کرنٹ لگنے سے زمین پر گر گیا۔ اسی دوران کرنٹ والا پنکھا بھی اوپر آ گرا، جس سے وہ موقع پر ہی جاں بحق ہو گیا۔
بعدازاں جب ملازم نے ڈیرے پر آ کر دیکھا تو عفان احمد کرنٹ زدہ پنکھے کے نیچے تھا۔ فوری طور پر اہل خانہ کو اطلاع دی گئی، جنہوں نے نوجوان کو مقامی ہسپتال منتقل کیا مگر ڈاکٹروں نے موت کی تصدیق کر دی۔
حادثے کی خبر سن کر گھر میں کہرام مچ گیا۔ والدین اور اہل خانہ غم سے نڈھال ہو گئے۔ مرحوم عفان احمد کو علاقہ میں ایک ملنسار اور خوش اخلاق شخصیت کے طور پر جانا جاتا تھا۔
بعد ازاں ان کی میت نمازِ جنازہ کے لیے گھر سے اٹھی تو فضاء سوگوار ہو گئی اور علاقہ کی ہر آنکھ اشکبار تھی۔ نوجوان کو سینکڑوں سوگواران کی موجودگی میں آہوں اور سسکیوں کے ساتھ مقامی قبرستان میں سپردِ خاک کر دیا گیا۔
