پنڈدادنخان کے محلہ اتفاق کالونی میں گزشتہ رات غریب محنت کش محمد اکمل کے مکان میں اچانک آگ بھڑک اٹھی، جس نے دیکھتے ہی دیکھتے پورے گھر کو اپنی لپیٹ میں لے لیا۔
واقعے کے وقت اہل محلہ نے اپنی مدد آپ کے تحت آگ بجھانے کی کوشش کی تاہم ریسکیو 1122 اور فائر بریگیڈ کو اطلاع نہ دی جا سکی۔ آتشزدگی کے نتیجے میں محمد اکمل کا مکان اور اس میں موجود تمام سامان جل کر خاکستر ہو گیا، تاہم خوش قسمتی سے کوئی جانی نقصان نہیں ہوا۔
اہل محلہ کے مطابق آگ بھڑکنے سے قبل ایک زور دار دھماکے کی آواز سنی گئی، جو مبینہ طور پر گیس سلنڈر پھٹنے کا نتیجہ تھا۔ محمد اکمل جو پہلے ہی معاشی مشکلات کا شکار ہیں، اس حادثے کے بعد شدید پریشانی میں مبتلا ہیں۔
اہل علاقہ نے حکومت اور فلاحی تنظیموں سے اپیل کی ہے کہ محمد اکمل کی فوری مدد کی جائے تاکہ وہ دوبارہ اپنی زندگی کو معمول پر لا سکیں۔
