ورلڈ یوتھ فٹبال ٹورنامنٹ، پاکستان کی قومی اسٹریٹ چائلڈ ٹیم کا فاتحانہ آغاز

اوسلو: پاکستان اسٹریٹ چائلڈ فٹبال ٹیم کا یورپ کے سب سے بڑے یوتھ فٹبال ٹورنامنٹ میں اپنے پہلے میچ میں فاتحانہ آغاز۔ قومی اسٹریٹ چائلڈ فٹبال ٹیم نے ناروے کے استور فٹبال کلب کو 6-1 سے شکست دی۔

استور فٹبال کلب نے قومی ٹیم کے خلاف میچ کے پہلے ہاف میں پہلا گول اسکور کیا جس کے چند لمحوں بعد ہی قومی ٹیم کی جانب سے استور فٹبال کلب کے خلاف گول کرکے میچ برابر کر دیا گیا۔

میچ کے دوسرے ہاف میں قومی اسٹریٹ چائلڈ فٹبال ٹیم نے لگاتار 5گول کئے، گول کرنے والوں میں عبدالغنی نے2،عیسیٰ ،جنید،اویس اور محمد خان نےایک، ایک گول کیا۔

قومی اسٹریٹ چائلڈ فٹبال ٹیم کے کپتان محمد عدیل نے میچ کے بعد گفتگو کرتے ہوئے کہا کہ ہم نے بھرپور پریکٹس کی ہوئی ہے اور نئی تیکنکس بھی سیکھی ہیں۔ انشاءاللہ تمام میچز جیتیں گے ،کھلاڑیوں کے حوصلے بلند ہیں۔قومی اسٹریٹ چائلڈ فٹبال ٹیم آج 29جولائی کو اپنا دوسرا گروپ میچ ناروے کے وارڈینسیٹ فٹبال کلب خلاف کھیلے گی۔

یاد رہے قومی اسٹریٹ چائلڈ فٹبال ٹیم ناروے کپ 2023 میں رنر اَپ رہی تھی ۔