جہلم: گورنمنٹ ایم سی اسلامیہ ہائیر سیکنڈری اسکول جہلم میں سالانہ تقسیم انعامات کی شاندار تقریب منعقد ہوئی، جس میں بطور مہمانِ خصوصی صوبائی مشیر صحت پنجاب میجر جنرل (ر) ڈاکٹر اظہر محمود کیانی نے شرکت کی۔
سکول کے پرنسپل، فیکلٹی ممبران اور طلبہ نے مہمانوں کا پرتپاک استقبال کیا۔ تقریب کے دوران میجر جنرل (ر) ڈاکٹر اظہر محمود کیانی نے پوزیشن ہولڈرز طلبہ اور اساتذہ میں انعامات اور شیلڈز تقسیم کیں اور ان کی محنت اور کارکردگی کو سراہا۔
مشیر صحت ڈاکٹر اظہر محمود کیانی نے اپنے خطاب میں کہا کہ موجودہ دور سائنس اور ٹیکنالوجی کی ترقی کا دور ہے، جس کے بغیر کامیابی ممکن نہیں۔ انہوں نے طلبہ پر زور دیا کہ وہ محنت اور لگن سے تعلیم حاصل کریں تاکہ مستقبل میں اپنے والدین، اساتذہ، ضلع اور ملک کا نام روشن کر سکیں۔
اس موقع پر سکول انتظامیہ نے طلبہ کی تعلیمی کارکردگی کو سراہا اور ان کی حوصلہ افزائی کی۔ تقریب میں والدین، اساتذہ، معززین شہر اور طلبہ کی بڑی تعداد نے شرکت کی، جنہوں نے اس شاندار تقریب کو بے حد سراہا۔
