مسلمان رنجشیں ختم کرکے باہمی احترام و محبت کو فروغ دیں، ڈاکٹر حماد لودھی

گریٹر مانچسٹر / بولٹن: یوکے اسلامک مشن کے مرکزی صدر ڈاکٹر حماد لودھی نے کہا ہے کہ اسلام نے زندگی کے تمام پہلوؤں کے حوالے سے احترام انسانیت کے سنہری اصولوں کے تحت تعلیمات عطا کی ہیں جو زندگی میں حسن اور توازن پیدا کرنے کی ضمانت دیتی ہیں۔ اسلام کا فلسفہ انسانی حقوق دیگر مذاہب سے ممتاز ہے۔

ان خیالات کا اظہار انہوں نے نارتھ ویسٹ کے دورہ کے دوران بولٹن برانچ کے زیر اہتمام مشن کے منعقدہ اجلاس سے خطاب کرتے ہوئے کیا۔ انہوں نے کہا کہ اسلام زندگی کے ہر شعبے میں اعتدال اور توازن کا درس دیتا ہے جبکہ دنیا کے دیگر معاشرتی اور سیاسی نظام انسانی حقوق کے احترام اور رفعت کی یہ نظیر پیش نہیں کر سکتے۔

انہوں نے کہا کہ مسلمانوں کے اندر پائی جانے والی ناانصافی اور تعصب سے آج کا مسلمان انتہائی کمزور پوزیشن میں ہے جس کی بنیادی وجہ آپس میں اتحاد و اتفاق کا نہ ہونا ہے اور یہی وجہ ہے کہ جس سے اسلام دشمن عناصر فائدہ اٹھا رہے ہیں۔ انہوں نے کہا کہ مسلمانوں کو چاہئے کہ وہ آپس کی نفرتوں اور رنجشوں کو ختم کرکے باہمی احترام ، محبت اور یگانگت کا جذبہ پیدا کریں تاکہ برطانیہ میں پروان چڑھنے والی نوجوان نسل کا مستقبل سنوارا جا سکے۔

انہوں نے برطانوی مسلمانوں کی ذمہ داریوں کا ذکر کرتے ہوئے کہا کہ برطانیہ میں کم و بیش چالیس لاکھ مسلمان آباد ہیں انہیں چاہئے کہ وہ برطانیہ کی سیاست میں بھرپور حصہ لیں تاکہ وہ اپنے حقوق کا تحفظ کر سکیں بلکہ عالمی معاملات میںیہاں کی سیاسی جماعتوں کی پالیسیوں پر اثرانداز ہو سکیں۔

انہوں نے کہا بعض سیاسی رہنماؤں نے یہاں کی سیاست سے بدظن ہو کر الگ تھلگ رہبے کی پالیسی اپنائی ہوئی ہے جو ہرگز درست نہیں انہیں اس پر سنجیدگی سے غور کرنا چاہئے۔

نارتھ زون کے صدر مولانا اقبال نے کہا کہ یوکے اسلامک مشن ہر قسم کے تعصبات سے بالاتر ہوکر یہاں پر مقیم مسلمانوں کو اپنی دینی ذمہ داریاں پوری کرنے اور غیرمسلم آبادی تک اسلام کی دعوت پہنچانے کا فریضہ سرانجام دے رہی ہے۔

انہوں نے کہا کہ اسلامک مشن کا ماننا ہے کہ اسلام ایک مکمل ضابطہ حیات ہے اور وہ اس کی وکالت کرتی ہے کہ اسلامی تعلیمات کا سیاست اور ریاستی وجود سمیت زندگی کے تمام معاملات میں اطلاق ہونا چاہئے۔

جماعت اسلامی برطانیہ کے سابق کنوینر راجہ عارف خان نے کہا کہ اسلام انسانیت کی فلاح و بہبود کا سب سے بڑا ضامن ہے اور اسلامی تعلیمات کی خوبصورتی کا راز یہی ہے کہ وہ فرد اور معاشرے کو یکساں طور پر بدلنے کی صلاحیت رکھتی ہیں اور اگر آج مسلمان اسلام کے بتائے ہوئے سنہری اصولوں کی پیروی کریں تو پھر کوئی وجہ نہیں کہ وہ اپنا کھویا ہوا وقار دوبارہ حاصل نہ کرسکے۔

انہوں نے اسلامک مشن کے صدر ڈاکٹر حماد لودھی کی بولٹن آمد کا خیرمقدم کرتے ہوئے کہا کہ بولٹن برانچ اگرچہ نئی ہےمگر مختصر عرصے میں ڈاکٹر حماد لودھی جس طرح برانچوں میں اپنے ساتھیوں کا اضافہ کر رہے ہیں وہ ایک حوصلہ افزا پیش رفت ہے اور ساتھیوں کی اپنے مقصد سے لگن کا منہ بولتا ثبوت ہے۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button