جہلم: پنجاب حکومت کی سہ ماہی کارکردگی رپورٹ جاری، ضلع جہلم پنجاب بھر میں چوتھے نمبر پر آگیا۔
تفصیلات کے مطابق پنجاب حکومت کی جانب سے جاری کردہ سال 2025 کی دوسری سہ ماہی (اپریل تا جون) کارکردگی رپورٹ میں ضلع جہلم نے 93 اعشاریہ 29 فیصد اسکور کے ساتھ شاندار کارکردگی کا مظاہرہ کرتے ہوئے پنجاب بھر کے 38 اضلاع میں چوتھی پوزیشن حاصل کر لی۔
حکومت پنجاب نے تمام اضلاع میں سروس ڈیلوری، عوامی خدمات، ترقیاتی منصوبوں پر پیشرفت اور انتظامی امور کے حوالے سے کارکردگی جانچنے کے لیے جدید مانیٹرنگ سسٹم متعارف کروایا ہے۔ اس نظام کے تحت اضلاع کو ماہانہ بنیادوں پر مختلف محکموں کی مجموعی کارکردگی اور عوامی اطمینان کے لحاظ سے اسکور دیا جاتا ہے۔
ڈپٹی کمشنر جہلم میثم عباس نے اس اہم کامیابی پر اظہار خیال کرتے ہوئے کہا کہ یہ اعزاز ضلعی انتظامیہ کی ٹیم ورک، محنت، شفافیت اور عوامی خدمت کے جذبے کا عملی ثبوت ہے۔ اُن کا کہنا تھا کہ شہریوں کی سہولت، مسائل کا حل اور سرکاری فنڈز کا مؤثر استعمال ہماری ترجیح ہے اور اس رپورٹ نے اس عزم کی تصدیق کر دی ہے۔
ڈی سی میثم عباس نے مزید کہا کہ ضلع جہلم کی اس نمایاں پوزیشن پر تمام محکمے مبارکباد کے مستحق ہیں، اور یہی جذبہ ہمیں آئندہ سہ ماہی میں مزید بہتر کارکردگی دکھانے کے لیے متحرک رکھے گا۔
شہری حلقوں کی جانب سے بھی ضلعی انتظامیہ کو سراہا گیا ہے اور اُمید ظاہر کی گئی ہے کہ یہ کارکردگی عوامی ریلیف اور ترقیاتی کاموں میں مزید بہتری کا پیش خیمہ ثابت ہو گی۔
