جہلم: ڈسٹرکٹ پولیس آفیسر جہلم ناصر محمود باجوہ کی ہدایت پر ایس پی انویسٹی گیشن جہلم محمد حسیب راجہ نے تھانہ سول لائنز، تھانہ صدر اور تھانہ سٹی کا دورہ کیا، ایس پی انویسٹی گیشن جہلم نے متعلقہ ریکارڈ اور صفائی کے انتظامات کا تفصیلی جائزہ لیا۔
اس موقع پر انہوں نے کہا کہ تھانہ جات کے ریکارڈ و مال مقدمہ کو محفوظ بنایا جائے، تھانہ جات کو SIPS ایس او پیز پر عمل پیرا ہونے کی ہدایات دیں، تھانوں کی صفائی اور سروسز کے معیار پرکوئی سمجھوتہ نہ کیا جائے۔
محمد حسیب راجہ نے کہا کہ سنگین نوعیت کے مقدمات میں سراغ رسانی ،گرفتاری ملزمان اور برآمدگی مال مسروقہ کو یقینی بنایا جائے۔ خواتین،بچوں اور معاشرے کے دیگر کمزور طبقات کے مسائل ترجیحی بنیادوں پرحل کیے جائیں،ایسے کسی بھی واقعہ کے رپورٹ ہونے کی صورت میں متعلقہ ایس ڈی پی اوز اور ایس ایچ اوز بروقت موقع پر پہنچیں۔
انہوں نے کہا کہ انسپکٹر جنرل آف پولیس پنجاب کی ہدایات کی روشنی میں دی گئی ٹائم لائن کے اندر ایف آئی آر کے اندراج کو یقینی بنایا جائے، زیر تفتیش مقدمات کو میرٹ پر یکسو کیا جائے، جرائم کی شرح کو کم کرنے کے لیے موثر پٹرولنگ کی جائے۔
ایس پی انویسٹی گیشن جہلم محمد حسیب راجہ نے کہا کہ متعلقہ پولیس افسران کو شہریوں کے ساتھ اچھے اخلاق سے پیش آئیں اور مسائل کے حل کو یقینی بنایا جائے، انصاف کی فراہمی کے لیے تمام وسائل بروئے کار لائے جائیں۔
