سارہ شریف قتل کیس میں اہم موڑ، جہلم کے رہائشی سارہ کے والد نے اعتراف جرم کرلیا

لندن: سارہ شریف کے والد عرفان شریف نے بیٹی کے قتل کا جرم قبول کرلیا ہے.

میڈیا رپورٹس کے مطابق لندن کی اولڈ بیلی عدالت میں سارہ قتل کیس کی سماعت کے دوران ٹرائل میں خوفناک انکشاف سامنے آیا ہے کہ عرفان شریف نے اعتراف کیا ہے کہ ان کی بیٹی سارہ ان کی وجہ سے قتل ہوئی۔

ٹرائل کے دوران پاکستان کے صوبہ پنجاب کے ضلع جہلم سے تعلق رکھنے والے عرفان شریف اور ان کی اہلیہ ایک دوسرے پر سنگین الزامات بھی عائد کررہے ہیں لیکن ایک بات سامنے آئی ہے کہ دونوں نے مل کر بیٹی سارہ پر تشدد کیا اور اسے قتل کیا، ملزمان کا ٹرائل 10 دن تک جاری رہے گا۔

واضح رہے کہ گزشتہ سال اگست میں برطانیہ میں 10 سالہ بچی کا قتل ہوا تھا، 10 سالہ سارہ شریف اپنے والد عرفان شریف، 5 بہن بھائیوں اور سوتیلی ماں کے ساتھ رہ رہی تھی جبکہ سارہ کی لاش ملنے سے ٹھیک 1 دن قبل سارہ کے والدین اور بہن بھائی ہنگامی حالت میں ٹکٹیں کرا کر پاکستان پہنچے تھے۔

سرے پولیس کے مطابق 10 اگست کو 41 سالہ عرفان شریف نے پاکستان سے ایمرجنسی نمبر ملایا جس کے بعد پولیس اہلکار گھر تک پہنچے جہاں انھیں سارہ کی لاش ملی۔

یاد رہے کہ بچی کی لاش 10 اگست کو سرے کے علاقے ووکنگ میں واقع گھر سے ملی تھی جہاں اس کے علاوہ اور کوئی موجود نہیں تھا۔

گھر والے برطانیہ سے کیوں فرار ہوئے؟

سوال یہ پیدا ہوتا ہے باقی تمام گھر والے برطانیہ سے کیوں فرار ہوئے؟

سارہ کے قتل سے ایک دن قبل ہنگامی بنیادوں پر تمام فیملی پاکستان روانہ ہوگئی تھی۔ جس پر سارہ کے دادا کا کہنا ہے کہ سارہ کی موت ایک حادثہ ہے اور ان کے بیٹے کے فوراً پاکستان روانہ ہونے کی وجہ یہی ہے کہ وہ ڈر گیا تھا جس کی وجہ سے وہ پاکستان آگیا۔

’جب انسان کو دماغ پر چوٹ لگے تو اسے سمجھ نہیں آتی کہ وہ کیا کرے اور وہ ڈر کے مارے پاکستان بھی اسی لیے آیا کہ اسے کچھ سمجھ نہیں آیا، میں چاہتا ہوں کہ میرا بیٹا سامنا کرے اور کیس لڑے۔‘

برطانوی پولیس نے سارہ کے والد عرفان شریف، سوتیلی ماں بینش اور چچا فیصل کو مطلوب قرار دے کر پاکستان میں جہلم پولیس سے بھی رابطہ کیا تھا، مگر جہلم پولیس مطلوب ملزمان کو تحویل میں نہ لے سکی اور وہ پاکستان سے بھی فرار ہو گئے ۔

سارہ شریف کے والد 41 سالہ عرفان شریف، ان کی اہلیہ 29 سالہ بینش بتول اور عرفان کے بھائی 28 سالہ فیصل ملک کو گیٹوک ایئرپورٹ سے برطانیہ کے مقامی وقت کے مطابق شام سات بج کر 45 منٹ پر اس وقت گرفتار کیا گیا جب وہ دبئی سے آنے والی پرواز سے اتر رہے تھے۔

اسی حوالے سے بات کرتے ہوئے ترجمان جہلم پولیس کا کہنا تھا انہیں مطلوب افراد کو ٹریس کرنے کا کہا گیا تھا جس کے لیے انہوں نے پوری کوشش کی مگر وہ انہیں ٹریس کرنے میں ناکام رہے۔

عرفان شریف کون ہے؟

جہلم تحصیل دینہ کے علاقہ کڑی جنجیل سے تعلق رکھنے والے ملزم ملک عرفان نے 2009 میں برطانیہ میں پولش خاتون اوگلا سے شادی کی جس سے ایک بیٹی اور بیٹے کی پیدائش ہوئی۔ سال 2017 میں عرفان نے اوگلا کو طلاق دیدی۔ طلاق کے بعد دونوں بچوں کو والد کی تحویل میں دے دیا گیا۔

برطانوی اخبارات کے مطابق عرفان شریف 20 برس قبل پاکستان سے برطانیہ آیا تھا، وہ ٹیکسی چلاتا تھا۔ اپریل میں اس نے ساڑھے 5 لاکھ پاؤنڈ سے سرے میں گھر خریدا تھا۔ جہاں وہ اپنی دوسری اہلیہ بینش اور بچوں کے ساتھ مقیم ہوئے۔