جہلم: عیدالفطر کے موقع پر پبلک ٹرانسپورٹ میں اوورچارجنگ کے خلاف انتظامیہ کی عدم کارروائی پر مسافر سراپا احتجاج بن گئے اور فوری نوٹس لینے کا مطالبہ کر دیا۔
وزیراعلیٰ پنجاب مریم نواز شریف کی جانب سے عید سے قبل واضح ہدایات جاری کی گئی تھیں کہ اضافی کرایہ وصول کرنے والے ٹرانسپورٹرز کے خلاف سخت کارروائی عمل میں لائی جائے، تاہم ضلع جہلم میں ڈسٹرکٹ ریجنل ٹرانسپورٹ اتھارٹی کی جانب سے اس حوالے سے مؤثر اقدامات دیکھنے میں نہیں آئے۔
ذرائع کے مطابق ٹرانسپورٹرز نے مختلف روٹس پر مسافروں سے من مانی کرایہ وصول کیا، جن میں جہلم تا پنڈدادنخان، جہلم تا دینہ، دینہ تا ڈومیلی، دینہ تا براگواہ، پنڈدادنخان تا ٹوبہ، پنڈدادنخان تا احمدآباد، پنڈدادنخان تا للہ، جہلم تا چکری راجگان اور جہلم تا پنڈسوکہ شامل ہیں۔
شہریوں کا کہنا ہے کہ انتظامیہ سب کچھ جاننے کے باوجود ٹرانسپورٹرز کے خلاف کارروائی سے گریزاں ہے، جس کے باعث مسافروں کو شدید مشکلات کا سامنا ہے جبکہ زائد کرایہ وصولی کے ساتھ گاڑیوں میں مقررہ تعداد سے زیادہ مسافروں کو بٹھایا جا رہا ہے۔
متاثرہ مسافروں نے ڈپٹی کمشنر و چیئرمین ڈسٹرکٹ ریجنل ٹرانسپورٹ اتھارٹی اور ایڈوائزر صوبائی محتسب پنجاب جہلم سے مطالبہ کیا ہے کہ اضافی کرایہ وصول کرنے اور اوورلوڈنگ کرنے والے ٹرانسپورٹرز کے خلاف فوری نوٹس لے کر فوجداری مقدمات درج کیے جائیں تاکہ ضلع میں جاری اس صورتحال کا خاتمہ ممکن بنایا جا سکے۔
