ملتان: تنظیم سادات بنی ہاشم (تسبیح) پاکستان کے بینر تلے دوسرا سالانہ اجلاس 20 اپریل 2025 کو مخدوم رشید، ملتان میں منعقد ہوگا۔
یہ اجلاس تسبیح جنوبی پنجاب کے زیر اہتمام ہوگا، جس میں ملک بھر سے خانوادہ حضرت بہاء الدین زکریا ملتانیؒ اور حضرت مخدوم عبد الرشید حقانیؒ کے نمائندہ وفود شریک ہوں گے۔
تسبیح پاکستان ان دونوں روحانی خانوادوں کی کل پاکستان نمائندہ تنظیم ہے، جس کی قیادت معروف ریسرچ اسکالر ڈاکٹر واجد پیرزادہ کر رہے ہیں جبکہ ممتاز سیاسی و سماجی شخصیت جناب مخدوم جاوید ہاشمی، جو خانوادہ مخدوم عبد الرشید حقانیؒ سے تعلق رکھتے ہیں، تنظیم کے سرپرستِ اعلیٰ ہیں۔
تنظیم سادات بنی ہاشم کا مقصد امامت، قیادت، سیادت اور تربیت کے ذریعے ان خانوادوں کو ملکی سطح پر متحرک کردار ادا کرنے کے قابل بنانا ہے۔
مجوزہ اجلاس میں نہ صرف مخدوم رشید ملتان بلکہ پیل پیران (ضلع خوشاب)، بھیرہ شریف، پیر دا کھارہ، کرولی پیراں، مری، سرکال، مابیر، پیر بھچر، پوڑھ میانہ اور جنوبی پنجاب کے دیگر علاقوں سے خانقاہوں کے نمائندہ وفود اور پارلیمانی شخصیات شرکت کریں گی۔
اجلاس میں تنظیم کے تسبیح پروگرام کے حوالے سے آئندہ کا لائحہ عمل مرتب کیا جائے گا۔
