جہلم پولیس کی اہم کارروائی میں چوری، موٹر سائیکل چوری اور ڈکیتی کی متعدد وارداتوں میں ملوث کوڈو گینگ کے تین ملزمان گرفتار کر لیے گئے۔ پولیس نے ملزمان کے قبضے سے مسروقہ موٹر سائیکلز، نقدی اور غیر قانونی اسلحہ برآمد کر لیا۔
تفصیلات کے مطابق جہلم میں ایس ایچ او تھانہ سٹی اور ان کی ٹیم نے کامیاب کارروائی کرتے ہوئے ملزمان فیصل شہزاد، عدنان منیر اور ارشد محمود کو گرفتار کیا۔ ملزمان کے قبضے سے 8 عدد مسروقہ موٹر سائیکلز اور 80 ہزار روپے نقدی برآمد کیے گئے، جبکہ ملزم فیصل شہزاد سے ایک 30 بور پستول بمعہ ایمونیشن بھی برآمد کر لیا گیا۔
پولیس حکام کا کہنا ہے کہ گرفتار ملزمان موٹر سائیکل چوری اور ڈکیتی کے متعدد مقدمات میں ملوث ہیں اور ان کے خلاف ٹھوس شواہد کے ساتھ چالان تیار کرکے عدالت میں پیش کیا جائے گا، تاکہ انہیں قرار واقعی سزا دلوائی جا سکے۔
ڈسٹرکٹ پولیس آفیسر (ڈی پی او) جہلم طارق عزیز سندھو نے اس کامیاب کارروائی پر پولیس ٹیم کو شاباش دیتے ہوئے کہا کہ شہریوں کے جان و مال کا تحفظ اولین ترجیح ہے اور جرائم پیشہ عناصر کسی رعایت کے مستحق نہیں۔
انہوں نے مزید کہا کہ جرائم کے خاتمے کے لیے پولیس اپنی کارروائیاں جاری رکھے گی اور عوام کے تعاون سے شہر کو محفوظ بنانے کے لیے ہر ممکن اقدام اٹھایا جائے گا۔
