جہلم: آئیسکوسرکل جہلم کی انتظامیہ کی نا اہلی، شہر اور گردو نواح میں جگہ جگہ بجلی کے لٹکتے تار علاقہ مکینوں کیلئے جان کا خطرہ بن گئے، لٹکتی ننگی اوربوسیدہ تاریں کسی بھی جانی و مالی حادثے کا سبب بن سکتی ہیں۔
تفصیلات کے مطابق آئیسکو سرکل جہلم کی بیشتر سب ڈویژن کے افسران کی عدم دلچسپی کی وجہ سے شہر سمیت ملحقہ اور مضافاتی علاقوں ، بازارجن میں مین بازار، کناری بازار، نیا بازار، چوک گنبد والی مسجد سے ملحقہ بازار، محلہ اسلام پورہ، چشتیاں محلہ، جادہ ، مشین محلہ، بلال ٹاؤن، چونترہ ، کھرالہ پروفیسر کالونی ، پیرا غیب، کالا گجراں ، کشمیر کالونی ، مجاہدہ آباد، مخدوم آباد، قیصرہ آباد، روہتاس روڈ سمیت دیگر علاقوں میں لٹکتی بجلی کی ننگی اور بوسید و تاروں کی وجہ سے شہری پریشانی کا شکار ہیں۔
ان بوسیدہ تاروں کی وجہ سے وولٹیج کی کمی بیشی معمول بن گئی ہے جس کی وجہ سے آئے روز صارفین کے برقی آلات و غیرہ خراب یا جل جاتے ہیں ان بوسیدہ تاروں کی وجہ سے بارش کے موسم میں متعدد بار دیواروں میں کرنٹ بھی آچکے ہیں۔
آئیسکو سرکل جہلم میں آئے روز تاروں کی مرمت کے نام پر سارا سارا دن بجلی بند رکھی جاتی ہے لیکن شہر کے گنجان آباد علاقوں، بازاروں اور رہائشی علاقوں میں آج تک کسی اہلکار نے ان لٹکتی تاروں کو درست کرنا گوارہ نہیں کیا۔
صارفین نے آئیسکو چیف سے تاروں کی جگہ فور کور کوائل بچھانے کا مطالبہ کیاہے تاکہ شہریوں کو سروں پر منڈلاتے خوف کے سائے ختم ہو سکیں ۔
