جہلم کی ویست کالونی میں گیس لیکیج کے باعث گھر میں آگ لگ گئی، آتشزدگی کے باعث کمرے میں سوئے ہوئے ماں اور 4 بچے جھلس گئے، ریسکیو نے آگ پر قابو پالیا، تمام زخمیوں کو سی ایم ایچ منتقل کردیا گیا، خاتون اور ایک بچی کی حالت انتہائی تشویشناک ہے۔
جہلم اپڈیٹس کے مطابق یہ افسوسناک واقعہ جہلم کی ویسٹ کالونی میں پیش آیا جہاں ایک گھر میں اچانک گیس لیکیج کے باعث آگ لگ گئی جس کی وجہ سے ایک ہی کمرے میں سوئی ہوئی 40 سالہ خاتون عطیہ اور اسکے چار بچے جن میں 4 سالہ سیرت، 8 سالہ محمد، 15 سالہ عافیہ اور 10 سالہ مریم شامل ہیں بری طرح جھلس کرزخمی ہوگئے۔
ریسکیو کو اطلاع ملتے ہی امدادی کارروائیوں کا آغاز کیا گیا اور آگ پر قابو پالیا گیا، تمام زخمیوں کو سی ایم ایچ منتقل کردیا گیا۔
ریسکیو حکام کے مطابق کمرے میں گیس ہیٹر لگا ہوا تھا جس سے گیس لیکیج کے باعث آگ بھڑک اٹھی، آگ کی شدت اتنی تیز تھی کہ اس نے کمرے میں سوئے ہوئے تمام افراد کو اپنی لپیٹ میں لے لیا ۔
زخمیوں میں خاتون اور اسکی ایک چار سالہ بچی کی حالت انتہائی تشویشناک بتائی جارہی ہے۔
