جہلم/ پنڈ دادنخان: ممبر پنجاب اسمبلی مشتاق احمد نے کہا ہے کہ ضلع جہلم پر ظلم کرنا بند کیا جائے، وفاقی بجٹ میں ڈیڑھ ارب کی رقم کے اعلان سے ہماری توہین کی گئی، دھمکیاں لگانے والے مجھ سے لکھوا لیں احتجاج نہیں رکے گا۔ للِہ جہلم ڈیول کیرج وے عوام کے لیے عذاب بن چکا ہے، لوگوں نے نقل مکانی شروع کر دی ہے
جہلم کے حلقہ پی پی 26 سے منتخب ممبر صوبائی اسمبلی برگیڈیئر (ر) مشتاق احمد نے گزشتہ روز پنجاب اسمبلی میں اپنے حلقہ کے عوام کی نمائندگی کرتے ہوئے کہا کہ ضلع جہلم کے ساتھ دشمنی کی جا رہی ہے۔ مقدمات کے اندراج کی دھمکیوں سے احتجاج نہیں روک سکیں گی۔
ممبر صوبائی اسمبلی کا کہنا تھا کہ مسلم لیگ (ن) ضلع جہلم کی 35 سالہ رفاقتوں کا ہی خیال کرلے۔ انہوں نے سوالیہ انداز میں کہا کہ کیا موجودہ دور اقتدار میں لوگوں سے مرنے کا حق بھی چھینا جا رہا ہے ؟ انہوں نے پنجاب حکومت سے ڈیول کیرج وے کے لئے کم از کم پانچ ارب کی ادائیگی کے لئے درخواست کردی۔
انہوں نے خطاب کرتے ہوئے کہا کہ کیا صرف ضلع جہلم کے لئے حکومت کے پاس پیسے نہیں ہیں ؟ مشتاق احمد نے حکومت سے کھیوڑہ بائی پاس کے لئے بھی استدعا کی۔
ممبر صوبائی اسمبلی نے تحصیل پنڈدادنخان کے معروف صنعتی ادارے ایل سی آئی سابق (آئی سی آئی)کی طرف سے عوام پر ڈھائے جانے والے مظالم کے خلاف آواز بلند کرتے ہوئے کہا کہ 2400 کنال اونے پونے داموں خریدنے کی خواہش پانچ ہزار گھرانوں کو بے گھر کردے گی۔ برسوں سے آباد خاندانوں کو بے گھر کرنا عوام کے ساتھ ناانصافی ہے، اگر حکومت اتنے بڑے پاور فل ادارے کے سامنے بے بس ہے تو سینکڑوں گھرانوں کو بے گھر ہونے سے بچانے کا سدباب کرے۔
برگیڈیئر (ر) مشتاق احمد للِہ نے پنجاب اسمبلی میں خطاب کرتے ہوئے مزید کہا کہ پڑھا لکھا پنجاب کے نعرے لگانے والے ہماری تحصیل پنڈ دادنخان میں قائم ان تین کالجز کے بارے میں سوچیں جو اپ گریڈ ہونے کی بجائے ڈاؤن گریڈ ہوچکے ہیں۔ حکومت بے حس ہوچکی ہے، خدارا ہمارے حلقہ پر رحم کریں۔ علاقائی تعمیر وترقی اور عوامی مسائل کے حل کے لئے مخالفین کے ساتھ بیٹھنے کو تیار ہوں۔
