برمنگھم: پاکستان کی تعمیر و ترقی ہر شخص کا فرض ہے۔
ان خیالات کا اظہار برٹش پاکستان سوشل سوسائٹی کے زیر اہتمام بزنس کانفرنس میں مقررین نے کیا۔کانفرنس کے مہمان خصوصی کاروباری شخصیت میاں مقبول تھے ۔کانفرنس میں برمنگھم، لندن، سلاؤ سے کاروباری شخصیات نے شرکت کر کے اس عزم کا اعادہ کیا کہ پاکستان کو ترقی کی راہ پر گامزن کریں گے۔
مہمان خصوصی میاں مقبول نے کہا کہ ضرورت اس امر کی ہے کہ سیاست سے بالاتر ہو کر پاکستان اور قوم کی خدمت کی جائے، برطانیہ ہمارا ملک ہے، سب سے پہلے ہمیں برطانیہ کی ترقی و خوشحالی اور امن کیلئے جدوجہد کرنا ہو گی۔
برٹش پاکستان سوشل سوسائٹی کے صدر منور چیچی ،چیئرمین محمد قیصر چچی اور جنرل سیکرٹری محمد علی نے کہا کہ پاکستانیوں کے جذبہ حب الوطنی کا اندازہ اس بات سے لگایا جا سکتا ہے کہ کوئی قومی منصوبہ ہو یا کسی ہسپتال کی تعمیر کیلئے عطیات ہوں یا ڈیم کیلئے فنڈز، ایدھی کی خدمتِ خلق اپیل ہو یا قرض اتاروملک سنوارو کیلئے عطیات جمع ہوں اوورسیز پاکستانی سرگرم ہوتے ہیں۔
انہوں نے کہا کہ 2005 ء کے زلزلے میں زلزلہ زدگان کی مدد ہو یا آبادکاری ، سیلاب کی تباہ کاریوں میں سیلاب زدگان کی مدد ہویا دوسرے کسی حادثے میں نقصانات، متاثرین کی مدد کرنے میں ہر کوئی بڑھ چڑھ کر حصہ لیتا ہے۔16 دسمبر 2014 کا APS پشاور کا سانحہ اجتماعی غم تھا پاکستان کی ہر آنکھ اشکبار تھی بلکہ کئی روز تک فضا اور دل غم سے بوجھل رہے ۔ہر خوشی غمی کو ہم پاکستانی اجتماعی طور پر مناتے ہیں اورسیز پاکستان دور رہ کر بھی پاکستان کے بہت قریب رہتے ہیں بلکہ ان کا دل پاکستان میں ہی بستا ہے، ہمیں اپنے ملک اور اداروں سے پیار ہے بلکہ محبت ہے۔
صحافی وقار ملک نے کہا کہ اداروں کا وقار ہی ہمیں کامیابی کی طرف لے جاسکتا ہے۔ دنیا کے کسی ملک میں اپنے اداروں کے خلاف بات یا پروپیگنڈا نہیں ہوتا، ہمیں دیار غیر میں رہ کر اپنے ملک اور اداروں کا تحفظ کرنا ہو گا۔ تقریب کے اختتام پر میاں مقبول نے عصرانہ دیا۔
اس موقع پر ان کے صاحبزادے محمد ظہیر بھی موجود تھے۔
