جہلم: محکمہ ماحولیات کے افسران کی ڈیل یا ڈھیل، پولی تھین بیگز پر لگائی گئی پابندی کے احکامات دکانداروں نے ہوا میں اڑا دیے، شہرسمیت ضلع بھر کی تمام چھوٹی بڑی دکانوں پر پولی تھین بیگز کا استعمال دھڑلے سے جاری ہے۔
ان خیالات کا اظہار شہر کی سماجی، رفاعی، فلاحی و شہری تنظیموں کے عمائدین نے نماز جمعہ کی ادائیگی کے بعد اخبار نویسوں سے گفتگو کرتے ہوئے کیا۔ انہوں نے کہا کہ تاریخ اٹھا کر دیکھ لیں کہ آج تک گورنمنٹ نے جتنے قوانین بنائے ہیں ان پر عملدرآمد نہیں کرواسکی یہی صورتحال ایک مرتبہ پھر پولی تھین بیگز پہ لگائی گئی پابندی کی ہے۔
انہوں نے کہا کہ 28 جون گزر جانے کے بعد آج بھی شہرسمیت ضلع بھر میں پولی تھین بیگز کا استعمال دھڑلے سے جاری ہے اور کسی ایک دکاندار کے خلاف ضلعی انتظامیہ کی طرف سے نہ تو جرمانہ عائد کیا گیا اور نہ ہی کوئی ایف آئی آرسامنے آئی،یہی صورتحال روٹی اور نان کی قیمتوں پر بنائے گئے قانون کی ہورہی ہے گلی محلوں میں دھڑلے سے نان 25 روپے میں فروخت کیا جا رہا ہے کوئی پوچھنے والا کوئی نہیں۔
تنظیموں کے عمائدین کا کہنا تھا کہ پولی تھین بیگز کا استعمال ماحول کے لیے تباہ کن ہے اس سے شہری مختلف بیماریوں کا شکار ہو رہے ہیں اس لیے اس پر لگائی گئی پابندی پر مکمل عملدرآمد کروایا جانا چاہئے۔
دوسری جانب تنظیموں کے عمائدین نے شہریوں کو مخاطب کرتے ہوئے کہا کہ خدارا پولی تھین بیگز کے استعمال سے دوررہیں ، جب بھی گھر سے نکلیں اپنے ساتھ کپڑے کا تھیلا ، دودھ کے لئے برتن وغیرہ لازمی ساتھ رکھیں اور دکانداروں کی جانب سے دیئے جانے والے شاپنگ بیگز کو رد کردیں۔
