سوہاوہ/جہلم: صوبائی وزیر صحت خواجہ عمران نذیر نے سوہاوہ کے نواحی علاقہ میانی میں چھاپہ مار کر لاکھوں روپے مالیت کی چوری شدہ سرکاری اور جعلی ادویات کی بھاری مقدار برآمد کر لیں۔ ملزم کو موقع سے گرفتار کر لیا گیا۔
تفصیلات کے مطابق جہلم کی تحصیل سوہاوہ کے نواحی علاقہ میانی میں صوبائی وزیر پرائمری اینڈ سیکنڈری ہیلتھ کیئر پنجاب خواجہ عمران نذیر نے خفیہ اطلاع پر چھاپہ مار کر گھر میں قائم گودام سے 30 لاکھ روپے سے زائد مالیت کی چوری شدہ سرکاری اور جعلی ادویات برآمد کر لیں۔
وزیر پنجاب کی خصوصی ٹاسک فورس نے ان ادویات کا سراغ لگایا، عامر نامی ملزم کو موقع سے گرفتار کر لیا گیا جس سے مزید انکشافات متوقع ہیں۔
اس موقع پر صوبائی وزیر خواجہ عمران نذیر نے بتایا کہ ان ادویات میں راولپنڈی کے ایک سرکاری ہسپتال سے چوری شدہ ادویات شامل ہیں جن کی مالیت تیس لاکھ سے زائد ہے، ان ادویات میں جعلی دوائیاں بھی شامل ہیں۔ جعلی ادویات کو لیب ٹیسٹ کے لیے بھیجا جا رہا ہے۔
انہوں نے کہا کہ ملزم کی نشاندہی پر اس میں ملوث تمام عناصر کا سراغ لگایا جائے گا جن کے خلاف کسی قسم کی کوئی رعایت نہیں برتی جائے گی۔ ملزم کے خلاف چالان کر دیا گیا ہے جس کے بعد مقدمات درج کیے جائیں گے اور تفتیش کا دائرہ پنجاب سمیت دوسرے علاقوں تک بھی بڑھایا جائے گا ۔
وزیر صحت خواجہ عمران نذیر نے کہا کہ وزیر اعلیٰ پنجاب کے واضح ہدایات ہیں کہ پنجاب میں جعلی ادویات بنانے اور فروخت کرنیوالے والوں کے ساتھ آہنی ہاتھوں سے نمٹا جائے اور سرکاری ادویات چوری کر کے بیچنے والوں کو بے نقاب کیا جائے۔
انہوں نے مزید کہا کہ سی او ہیلتھ جہلم اور ڈی ایس پی سوہاوہ اس معاملہ پر مزید تفتیش کریں گے۔
