جہلم پولیس نے منشیات فروشی کے خلاف اپنی کارروائیوں کو مزید مؤثر بناتے ہوئے دو ملزمان کو گرفتار کر لیا، جن سے بھاری مقدار میں ہیروئن اور شراب برآمد ہوئی ہے۔
تفصیلات کے مطابق جہلم میں ایس ایچ او تھانہ سول لائنز اور ان کی ٹیم نے ایک کامیاب کارروائی کرتے ہوئے ملزم حامد علی کو گرفتار کر لیا۔ ملزم کے قبضے سے1 کلو 40 گرام ہیروئن برآمد کی گئی جو کہ غیر قانونی طور پر فروخت کے لیے رکھی گئی تھی۔
اسی طرح تھانہ کالا گجراں کے ایس ایچ او اور ان کی ٹیم نے کارروائی کرتے ہوئے ملزم طارق کو گرفتار کیا، جو شراب کی غیر قانونی سپلائی میں ملوث تھا۔ پولیس نے ملزم کے قبضے سے 20 لیٹر شراب برآمد کی۔
دونوں ملزمان کے خلاف انسداد منشیات ایکٹ کے تحت الگ الگ مقدمات درج کر لیے گئے ہیں۔ پولیس حکام کے مطابق ملزمان کو ٹھوس شواہد کے ساتھ عدالت میں پیش کیا جائے گا تاکہ انہیں قانون کے مطابق سخت سزا دلوائی جا سکے۔
اس حوالے سے ڈی پی او جہلم ناصر محمود باجوہ نے کہا کہ عوام کو منشیات کی لعنت سے بچانے کے لیے کارروائیاں جاری رہیں گی اور منشیات فروشوں کے خلاف زیرو ٹالرنس کی پالیسی اپنائی جائے گی۔ انہوں نے شہریوں سے اپیل کی کہ وہ کسی بھی مشکوک سرگرمی کی اطلاع فوری طور پر پولیس کو دیں تاکہ مجرموں کے خلاف فوری کارروائی کی جا سکے۔
