میرپور/ دینہ: سپر ہینڈز چیرٹی کے زیر اہتمام غریب، یتیم اور مستحق بچوں کو مفت تعلیم دینے والے ادارے علامہ اقبال سکولز کے طلباء کے درمیان مسٹ یونیورسٹی میرپور میں ایک شاندار دوستانہ کرکٹ میچ منعقد ہوا۔
دوستانہ کرکٹ میچ کا مقصد طلباء میں کھیلوں کے فروغ کے ساتھ ساتھ ان کی جسمانی صحت کو بہتر بنانا، ان میں ٹیم ورک اور اسپورٹس مین شپ کا جذبہ پیدا کرنا تھا۔
یہ کرکٹ میچ علامہ اقبال سکولز پاکستان و آزادکشمیر کے منیجر تاسب حسین چوہدری کی زیر نگرانی منعقد کیا گیا جبکہ اس کے آرگنائزر انٹرنیشنل کرکٹ کوچ عرفان الحق سلیمی تھے۔ میچ کے مہمان خصوصی حافظ حاجی اعجاز تھے جنہوں نے طلباء کی کاوشوں کو سراہا اور ان کی حوصلہ افزائی کی۔
دوستانہ کرکٹ میچ علامہ اقبال سکول دینہ اور علامہ اقبال سکول اسلام گڑھ کی ٹیموں کے درمیان کھیلا گیا۔ دینہ ٹیم نے ٹاس جیت کر پہلے بیٹنگ کرتے ہوئے مقررہ 10 اوورز میں 3 وکٹوں کے نقصان پر 71 رنز بنائے۔ جواب میں اسلام گڑھ ٹیم نے 7 اعشاریہ 5 اوورز میں 2 وکٹوں کے نقصان پر 73 رنز بنا کر میچ جیت لیا۔
میچ کے دوران طلباء نے بہترین کارکردگی کا مظاہرہ کیا جسے حاضرین نے خوب سراہا۔ میچ کے اختتام پر فاتح ٹیم، رنر اپ ٹیم اور تمام کھلاڑیوں میں انعامات تقسیم کئے گئے۔
تقریب میں پروفیسر ڈاکٹر رضوان اللہ، ڈائریکٹر سپورٹس مسٹ یونیورسٹی عابد حسین، سپورٹس کوچ مسٹ یونیورسٹی، پرنسپل علامہ اقبال سکول اسلام گڑھ اسلم ملک، فضل حسین، محمد عدیل اور دیگر اہم شخصیات سمیت برطانیہ سے تعلق رکھنے والے مرد و خواتین نے بھی شرکت کی۔ اس موقع ہر مقررین نے بچوں کی کارکردگی کو سراہتے ہوئے تعلیم اور کھیل کے متوازن امتزاج کی اہمیت پر روشنی ڈالی۔
تقریب سے خطاب کرتے ہوئے مقررین نے تمام کھلاڑیوں کو مبارکباد پیش کی اور سپر ہینڈز چیرٹی کے اس اقدام کو سراہا، جس کے تحت نہ صرف غریب، یتیم اور مستحق بچوں کو مفت تعلیم فراہم کی جا رہی ہے بلکہ ان کے لیے کھیلوں کے مقابلے بھی منعقد کروائے جا رہے ہیں۔
یاد رہے کہ سپر ہینڈز چیرٹی کے ذیلی ادارے علامہ اقبال سکول کے پانچ کیمپس دینہ، اسلام گڑھ، میاں محمد ٹاؤن میرپور، نیو لدڑ کھڑی شریف اور جاتلاں میں قائم ہیں جہاں غریب، یتیم اور مستحق بچوں کو مفت تعلیم فراہم کی جا رہی ہے۔
