پنڈدادنخان میں ڈکیتی کی واردات کے دوران زخمی ہونے والا ٹیکسی ڈرائیور جان کی بازی ہار گیا۔
تفصیلات کے مطابق پانچ روز قبل جہلم کی تحصیل پنڈدادنخان میں کھیوڑہ روڈ کے رہائشی ٹیکسی ڈرائیور مظہر حسین کو پنڈدادن خان ٹیکسی اسٹینڈ سے دو نامعلوم افراد نے کار بک کروا کر غریبوال سیمنٹ فیکٹری کی جانب لے کر گئے اور ساؤوال کے قریب پہاڑ پر ان ملزمان نے مظہر حسین پر کلہاڑی سے حملہ کیا، شدید تشدد کا نشانہ بنایا اور زخمی حالت میں درختوں کے قریب پھینک کر کار لے کر فرار ہوگئے۔
راہگیر کی اطلاع پر ریسکیو 1122 کی ٹیم فوری طور پر موقع پر پہنچی اور زخمی مظہر حسین کو تحصیل ہیڈکوارٹر اسپتال منتقل کیا، جہاں سے تشویشناک حالت کے باعث انہیں راولپنڈی ریفر کر دیا گیا۔ مظہر حسین ایک ہفتے تک موت و حیات کی کشمکش میں مبتلا رہنے کے بعد آج جان کی بازی ہار گئے۔
واقعے کی اطلاع ملتے ہی پنڈدادنخان پولیس موقع پر پہنچ گئی اور تحقیقات کا آغاز کر دیا تھا۔ ٹیکسی اسٹینڈ کے ڈرائیوروں کے مطابق کار بک کرانے والے افراد نامعلوم تھے۔ پولیس ملزمان کی تلاش میں مصروف ہے۔
