جہلم: ریسکیو 1122 نے بروقت کارروائی کرتے ہوئے جنگلات میں آگ کے تین بڑے واقعات پر قابو پا لیا۔
تفصیلات کے مطابق گزشتہ روز ریسکیو 1122 جہلم کو ایک ہی دن میں جھاڑیوں اور جنگلات میں آگ لگنے کے تین مختلف واقعات رپورٹ ہوئے۔ ریسکیو ذرائع کے مطابق تمام واقعات پر بروقت کارروائی کرتے ہوئے آگ پر قابو پا لیا گیا اور خوش قسمتی سے ان حادثات میں کوئی جانی نقصان نہیں ہوا۔
آگ لگنے کا پہلا واقعہ ٹلہ جوگیاں کے علاقے میں پیش آیا جبکہ دوسرا واقعہ کے ایف سی کے قریب اور تیسرا واقعہ موٹر وے آفس جی ٹی روڈ جہلم کے قریب رپورٹ ہوا۔ ریسکیو 1122 کی ٹیموں نے فوری پہنچ کر فائر فائٹنگ آپریشن مکمل کیا اور مزید نقصان سے بچا لیا۔
ڈسٹرکٹ ایمرجنسی آفیسر جہلم انجینئر سعید احمد نے عوام سے اپیل کی ہے کہ جنگلات میں احتیاط برتیں اور کسی بھی قسم کی چنگاری یا جلتی ہوئی چیز نہ پھینکیں۔ انہوں نے کہا کہ ایک معمولی سی چنگاری بڑے حادثے کا سبب بن سکتی ہے، جس سے نہ صرف جنگلات بلکہ انسانی جانوں اور املاک کو بھی خطرہ لاحق ہو سکتا ہے۔
ریسکیو 1122 نے عوام کو یقین دلایا کہ کسی بھی ایمرجنسی کی صورت میں فوری اطلاع دیں تاکہ بروقت مدد فراہم کی جا سکے۔
