پنڈدادنخان: وزیراعلیٰ پنجاب مریم نواز آئندہ چند ہفتوں میں للِہ جہلم روڈ اور ملحقہ علاقے کا دورہ کریں گی۔
یہ اعلان صوبائی مشیر صحت میجر جنرل (ر) ڈاکٹر اظہر محمود کیانی نے اپنے دورہ تحصیل ہیڈ کوارٹر ہسپتال پنڈدادنخان کے موقع پر کیا۔ تحصیل ہیڈ کوارٹر ہسپتال کے دورے کے دوران مشیر صحت ڈاکٹر اظہر کیانی نے دل کے مریضوں کا خود معائنہ کیا اور مریضوں کو مفت ٹیسٹ اور ادویات فراہم کی گئیں۔
اس موقع پر تحصیل پریس کلب پنڈدادنخان کے جنرل سیکرٹری نئیر اعوان، سیکرٹری انفارمیشن محمد وسیم وصی اور سالٹ رینج میڈیا کلب پنڈدادنخان کے صدر چوہدری سلیم باگڑی نے مشیر صحت کا استقبال کیا اور انہیں پھولوں کے گلدستے پیش کیے۔
میڈیا سے گفتگو کرتے ہوئے ڈاکٹر اظہر کیانی نے کہا کہ وزیراعلیٰ پنجاب کے ویژن کے مطابق پنجاب بھر کے اسپتالوں میں مکمل صحت کی سہولیات فراہم کی جا رہی ہیں، اور تحصیل ہیڈ کوارٹر ہسپتال میں ڈاکٹروں کی خالی اسامیوں کو پر کیا جا رہا ہے۔
انہوں نے مزید بتایا کہ راولپنڈی انسٹیٹیوٹ آف کارڈیالوجی (RIC) کے ماہر امراض قلب ڈاکٹر محسن، جو کہ پنڈدادنخان کے رہائشی ہیں، جلد ہی ہر ماہ ایک دن ہسپتال میں مریضوں کا معائنہ کریں گے۔
سیاسی معاملات پر بات کرتے ہوئے ڈاکٹر اظہر محمود کیانی نے کہا کہ جہلم میں مسلم لیگ (ن) متحد ہے اور ہر شخص اپنی سیاست کر سکتا ہے۔ انہوں نے کہا کہ للِہ تا جہلم ڈیول کیرج وے کے فنڈز جاری ہو چکے ہیں اور کام تیزی سے جاری ہے۔
ان کا مزید کہنا تھا کہ آئندہ چند ہفتوں میں وزیراعلیٰ پنجاب مریم نواز پنڈدادنخان کا دورہ کریں گی اور سڑک کے منصوبے کا جائزہ لیں گی۔ انہوں نے زور دیا کہ عوامی مسائل حل ہونے چاہئیں اور کوئی بھی کریڈٹ لے سکتا ہے، مگر اس معاملے پر سیاست نہیں ہونی چاہیے۔
انہوں نے یقین دہانی کرائی کہ علاقے کو جب بھی ان کی ضرورت پڑے گی، وہ ہر ممکن مدد فراہم کریں گے اور باقاعدگی سے دورے کرتے رہیں گے۔
